چیف ایگزیکٹو پاکستان کرکٹ بورڈ وسیم خان نے کہا ہے کہ پاکستان سپر لیگ کے اگلے ایڈیشن کو بیس فروری سے شروع کرنے کےلیے پوری منصوبہ بندی ہے۔ پاکستان سے متعلق انھوں نے کہا کہ یہاں سیکورٹی کا کوئی مسئلہ نہیں،فی الحال کوووڈ کا ہے۔انھوں نے کہا کہ نیوزی لینڈ میں کرونا کیسز نہیں ہونے کی وجہ سے کھلاڑیوں سمیت سب کو ایک نظر سے دیکھا جارہا ہے۔
پاکستان کرکٹ ٹیم کے دورہ نیوزی لینڈ اور کھلاڑیوں میں کرونا کی صورتحال پرچیف ایگزیکٹو پاکستان کرکٹ بورڈ وسیم خان نے سماء سے گفتگو میں بتایا کہ نیوزی لینڈ کرکٹ بورڈ سے مسلسل رابطے میں ہیں اورکرونا ٹیسٹنگ سے متعلق وہ ساری چیزیں شیئر کر رہے ہیں۔
وسیم خان نے بتایا کہ پاکستانی ٹیم اورآفیشلز کے 54 کرونا ٹیسٹ ہوئے، 8 مثبت آئے، 2 کی مزید چھان بین ہو رہی ہے کہ اُن کی بھی کوئی ہسٹری تو نہیں۔وسیم خان نے وضاحت دی کہ پہلے دن ، پھر تین ، چھ اور نو دن کی ٹیسٹنگ ہورہی ہے، جن کھلاڑیوں کے ٹیسٹ منفی نکلیں گے تو اُنہیں پریکٹس کی اجازت ملے گی۔ وسیم خان نے مزید کہا کہ کرکٹ نیوزی لینڈ سے کہا ہے وہ اپنی حکومت سے کہہ کر کھلاڑیوں کو ٹریننگ کی اجازت دلوائیں۔
وسیم خان نے یہ بھی بتایا کہ نیوزی لینڈ میں کرونا کیسز زیرو ہیں،اس لئے وہ سختی کر رہے ہیں،نیوزی لینڈ کی حکومت کرونا کے حوالے سے کھلاڑیوں سمیت سب کو ایک نظر سے دیکھتی ہے۔
پاکستان سپر لیگ کے اگلے ایڈیشن سے متعلق چیف ایگزیکٹو پاکستان کرکٹ بورڈ نے کہا کہ پی ایس ایل سیزن 6 کیلئے بھرپور تیاریاں جاری ہیں، پوری منصوبہ بندی ہے کہ 20 فروری کو پی ایس ایل شروع کردیں۔ ملک میں جاری کرکٹ کے مقابلے سے متعلق وسیم خان کا کہنا تھا کہ 150 ڈومیسٹک میچزاور انٹرنیشنل مقابلے ہوچکے ہیں،کوووڈ کے دوران پاکستان کرکٹ کی 60 فیصد واپسی ہو چکی ہے۔
چیف ایگزیکٹو پاکستان کرکٹ بورڈ نے یہ بھی کہا کہ پاکستان پہلا ملک تھا جس نے مکمل ڈومیسٹک کرکٹ شیڈول جاری کیا۔ غیرملکی ٹیم سے متعلق وسیم خان نے کہا کہ جنوبی افریقہ ٹیم کے دورہ پاکستان کا اعلان چند دن میں ہو جائے گا،2021 میں جنوبی افریقہ کے بعد نیوزی لینڈ اور انگلینڈ کے ٹیمیں پاکستان آئیں گی۔ پاکستان میں سیکورٹی کا کوئی معاملہ نہیں ، فی الحال کوووڈ کا مسئلہ ہے۔ انھوں نے امید ظاہر کی کہ سال 2022 میں آسٹریلیا اور انگلینڈ مکمل ٹور پر پاکستان آئیں گے۔
مستقبل کے فیصلوں سے متعلق وسیم خان کا کہنا تھا کہ سلیکشن کمیٹی کے چیئرمین کا آئندہ چند روز میں اعلان کریں گے،اگلے قومی اسکواڈ کا اعلان بھی جنوری میں ہوگا،6 ہیڈ کوچزوالا موجودہ اسٹرکچر ابھی برقرار رہے گا
