پریٹوریا: (ویب ڈیسک) کشمیری عوام کے ساتھ یکجہتی کے عالمی دن کے موقع پر جنوبی افریقہ کے سابق صدر نیلسن منڈیلاکے پوتے نکوسی منڈیلا نے کہا ہے کہ ہم کشمیر کے بہادر اور دلیر عوام کے ساتھ اپنی واضح یکجہتی کا اظہار کرتے ہیں اور اقوام متحدہ کی سلامتی کونسل کی قرارداد 47 کے مطابق ان کے حق خودارادیت کی حمایت کرتے ہیں۔
ان کا کہنا تھا کہ ہم تمام سیاسی قیدیوں کی فوری رہائی، جلاوطن کشمیریوں کی واپسی کے حق، اظہار رائے کی آزادی اور تمام کشمیریوں کے انسانی حقوق کی بحالی کا مطالبہ کرتے ہیں۔نیلسن منڈیلا کے پوتے نے کہا کہ ہم دنیا کے تمام آزادی پسند لوگوں سے مطالبہ کرتے ہیں کہ وہ کشمیریوں کی جدوجہد کی حمایت کریں اور مقبوضہ کشمیر کے 2019 کے بھارتی الحاق کو منسوخ کریں۔
انہوں نے کہا کہ کشمیر کے بہادر عوام نے 70 سال سے زائد عرصے سے آزادی اور حق خود ارادیت کے لیے جدوجہد کی ہے۔ ان کی جدوجہد ہماری جدوجہد ہے اور ہم ان کے بنیادی انسانی حقوق کی حمایت اسی طرح کرتے ہیں جس طرح ہم دنیا بھر کے مظلوموں اور مصیبت زدہ لوگوں کی منصفانہ جدوجہد کی حمایت کرتے ہیں۔نکوسی منڈیلا کا کہنا تھا پچھلی سات دہائیوں کے دوران کشمیر نے انسانی حقوق کی خلاف ورزیوں کے لامتناہی سلسلے کا مشاہدہ کیا ہے جن میں بڑے پیمانے پر قتل، جبری گمشدگیاں، وحشیانہ تشدد، عصمت دری اور جنسی استحصال کے ساتھ ساتھ سیاسی جبر، قبضے اور آزادی اظہار کو دبانا شامل ہیں۔
