کراچی: (ویب ڈیسک) ملک بھر میں مسلسل بڑھنے والی ڈالر کی قدر کو بریک لگ گئی۔200 روپے کی حد گر گئی۔
سٹیٹ بینک آف پاکستان کی سماجی رابطے کی ویب سائٹ ٹویٹر پر جاری کردہ اعداد و شمار کے مطابق رواں ہفتے کے آخری کاروباری روز کے دوران انٹر بینک میں روپے کے مقابلے میں امریکی ڈالر کی قیمت میں دو روپے 25 پیسے کی بڑی کمی ریکارڈ کی گئی۔
اعداد و شمار کے مطابق انٹر بینک میں روپے کے مقابلے میں امریکی ڈالر کی قیمت 202 روپے 1 پیسے سے کم ہو کر 199 روپے 76 پیسے ہو گئی ہے۔
دوسری طرف اوپن مارکیٹ میں ڈالر 2 روپے سستا ہوا اور نئی قیمت 201 روپے پر ہو گئی ہے۔
ملک بھر میں گزشتہ دو ماہ کے دوران سے روپے کے مقابلے میں امریکی ڈالر کی قیمت میں مسلسل بڑھوتری دیکھنے کو مل رہی تھی، سابق وزیراعظم عمران خان کے خلاف تحریک عدم اعتماد کامیاب ہونے اور شہباز شریف کے وزارتِ عظمیٰ کا عہدہ سنبھالنے کے بعد غیر یقینی صورتحال چھائی، اس دوران حکومت نے آئی ایم ایف کی شرائط پر تحفظات کا اظہار کیا۔ تاہم گزشتہ روز حکومت نے عالمی مالیاتی ادارے کی شرط پوری کرتے ہوئے پٹرولیم مصنوعات کی قیمت میں 30 روپے کا اضافہ کر دیا اور قوی امکان ہے کہ آئندہ چند روز میں آئی ایم ایف کے ساتھ قرض پروگرام بحال ہو جائے گا اور 90 کروڑ ڈالر کی نئی قسط پاکستان کو موصول ہو جائے گی جس کے بعد روپے کے مقابلے میں امریکی ڈالر کی قدر میں گراوٹ دیکھنے کو ملے گی۔
امریکی ڈالر سستا، 200 روپے کی حد گر گئی
