لاہور: (ویب ڈیسک) قومی ویمن کرکٹ ٹیم کی کپتان بسمہ معروف کو کامن ویلتھ گیمز میں بیٹی کو ساتھ رکھنے کی اجازت مل گئی، سربراہ ویمن کرکٹ پی سی بی تانیہ ملک کا کہنا ہے کہ بسمہ معروف کی فیملی کی گیم ویلج میں ٹھہرنے کی درخواست منظور کرنے پر وہ کامن ویلتھ گیمز کی انتظامیہ کی مشکور ہیں۔
تفصیلات کے مطابق پی سی بی ویمن ونگ کی چیف سلیکٹر اسماویہ اقبال نے برمنگھم کامن ویلتھ گیمز اور آئرلینڈ میں شیڈول سہ فریقی خواتین سیریز کے لئے ٹیم کا اعلان کردیا، سری لنکا کے خلاف ٹی ٹونٹی سیریز میں کلین سوئپ کرنے والے اسکواڈ کو برقرار رکھا گیا ہے۔
ذرائع نے بتایا ہے کہ ٹیم کے اعلان سے قبل کپتان بسمہ معروف، ہیڈ کوچ ڈیوڈ ہیمپ سے بھی مشاورت کی گئی، دونوں ایونٹس کے لئے 15رکنی اسکواڈ سمیت تین ریزروکھلاڑی غلام فاطمہ، ام ہانی اور صدر شمس بھی ساتھ جائیں گی۔
پاکستان، آئرلینڈ اور آسٹریلیا کی خواتین ٹیموں کے مابین سہ فریقی ٹی ٹونٹی سیریز 16 سے 24 جولائی تک بیلفاسٹ میں کھیلی جائے گی، کامن ویلتھ گیمز میں پاکستان ٹیم اپنے تین میچز 29، 31 جولائی اور 3 اگست کو بالترتیب بارباڈوس، بھارت اور آسٹریلیا کے خلاف کھیلے گی، قومی اسکواڈ کا تربیتی کیمپ یکم سے 11 جولائی تک اسلام آباد میں لگایا جائے گا،جبکہ اسکواڈ 12 جولائی کو برطانیہ روانہ ہوجائے گا۔
جبکہ قومی اسکواڈ میں بسمہ معروف (کپتان)، ایمن انور، عالیہ ریاض، انعم امین، عائشہ نسیم، ڈیانا بیگ، فاطمہ ثناء، گل فیروزہ (وکٹ کیپر)، ارم جاوید، کائنات امتیاز، منیبہ علی صدیقی (وکٹ کیپر)، ندا ڈار، عمیمہ سہیل ، سعدیہ اقبال اور طوبہٰ حسن شامل ہیں۔
کامن ویلتھ گیمز : بسمہ معروف کو بیٹی کو ساتھ رکھنے کی اجازت
