انگلش کرکٹ ٹیم کی قیادت معین علی کو ملنے کا امکان

لندن: (ویب ڈیسک) انگلش کرکٹ ٹیم کی قیادت آل راؤنڈر معین علی کو ملنے کا امکان ہے۔
غیر ملکی خبر رساں ایجنسی کے مطابق انگلینڈ کی ٹیم کے کپتان جوز بٹلر کی فٹنس مسائل کے باعث دورہ پاکستان میں شرکت مشکوک ہے جس کی وجہ سے دورہ پاکستان کے دوران ٹیم کی قیادت معین علی کو ملنے کا امکان ہے۔
17 سال بعد پاکستان کا دورہ کرنے والے انگلینڈ کے اسکواڈ کا اعلان رواں ہفتے کر دیا جائے گا۔ جوز بٹلر پنڈلی کے زخم کی وجہ سے دی ہنڈریڈ ٹورنامنٹ سے پہلے ہی باہر ہوچکے ہیں جبکہ دورہ پاکستان کے دوران جونی بیرسٹو اور بین اسٹوکس کو آرام دیئے جانے کا امکان موجود ہے۔
انگلینڈ کے جارح مزاج اوپنر لیام لیونگ اسٹون کی بھی دورہ پاکستان میں شرکت مشکوک ہے اور انہی وجوہات کی بنیاد پر معین علی کو ٹیم کی قیادت کے لیے فیورٹ سمجھا جا رہا ہے۔
واضح رہے کہ پاک انگلینڈ ٹی 20 سیریز 20 ستمبر سے 2 اکتوبر تک کراچی اور لاہور میں کھیلی جائے گی۔