ڈالرز کی بڑھتی قیمت ، پاکستان میں منعقد ہونے والا ایشین گالف ٹور ملتوی

کراچی: (ویب ڈیسک) رواں برس پاکستان میں ہونے والا ایشین گالف ٹور ڈالرز کی بڑھتی قیمت کے باعث ملتوی کردیا گیا۔
اس حوالے سے کراچی گالف کورس کمانڈنٹ کےکموڈور غضنفر عباس کا کہنا ہے کہ 4 سال بعد ہونے والے ایشین ٹور کو ڈالرز کی بڑھتی قیمت کے سبب ملتوی کیا گیا ہے، اخراجات بڑھنے کی وجہ سے ایشین ٹور کو اگلے برس منعقد کیا جائے گا ۔
کموڈور غضنفر عباس کے مطابق ایشین ٹور کے پلان کے وقت ڈالرز کی قیمت 170 تھی ، لیکن اب ایشین ٹورپر کم از کم 8 لاکھ ڈالرز سے زائد اخراجات آتے ہیں۔
ان کا کہنا تھا کہ 2023 میں ایشین سرکٹ کے ٹاپ گالفرز ایشین ٹور کا حصہ ہوں گے، سی این ایس ایشین گالف ٹور کے علاوہ دیگر کئی بڑے ٹورنامنٹ کا انعقاد کیا جارہا ہے۔
ان کا مزید کہنا تھا کہ ایشین ٹور 2007 کے بعد 2018 میں کراچی میں منعقد کروایا گیا تھا ۔
سال 2018 میں، تھائی لینڈ کے تیراوت کاویسری بندیت نے کے جی سی میں ایشین ٹور ٹائٹل جیتا تھا۔