چودھری شجاعت کیخلاف قرارداد کیوں منظور کی؟ کامل علی آغا کی پارٹی رکنیت ختم 

لاہور: (ویب ڈیسک) پاکستان مسلم لیگ ق کے سیکرٹری جنرل طارق بشیر چیمہ نے چودھری شجاعت کیخلاف قرارداد منظور کرنے پر کامل علی آغا کی بنیادی رکنیت ختم کر دی، کامل علی آغا کو آئندہ سے پاکستان مسلم ق کا نام استعمال کرنے سے روک دیا گیا۔
خط کے متن کے مطابق کامل علی آغا سے 28 جولائی 2022ء کو مسلم لیگ ق ہاؤس میں ہونے والے ایک اجلاس پر وضاحت مانگی گئی تھی جس کے بعد 4 اگست کو ایک اور نوٹس جاری کیا گیا، دوسرے نوٹس پر بھی کوئی وضاحت پیش نہ کر سکے۔
خط میں کہا گیا کہ چودھری شجاعت حسین کے بارے میں قرارداد منظور کر کے کامل علی آغا نے پارٹی کی ساکھ کو نقصان پہنچایا جس پر ان کی بنیادی رکنیت ختم کی جاتی ہے۔
خط میں مزید کہا گیا کہ کامل علی آغا نے سینیٹ سمیت پارٹی رکنیت کی وجہ سے جو عہدے حاصل کیے انہیں کالعدم قرار دیا جاتا ہے۔ فیصلے کی کاپی الیکشن کمیشن کو بھجوا دی گئی۔