شیعب اختر نے ’راولپنڈی ایکسپریس‘ سے خود کو علیحدہ کرلیا

اسلام آباد: (ویب ڈیسک) معروف سابق قومی کرکٹر شعیب اختر نے اپنی زندگی پر بننے والی فلم ’راولپنڈی ایکسپریس‘ سے خود کو علیحدہ کر لیا ہے۔
اس حوالے سے سابق فاسٹ باؤلر شعیب اختر نے مائیکرو بلاگنگ ویب سائٹ ٹوئٹر پر اپنے پیغام میں کہا کہ ’راولپنڈی ایکسپریس‘ کے نام سے بنائی جانے والی میری بائیو پک پر کچھ اختلافات تھے جس وجہ سے میں نے خود کو الگ کرلیا ہے۔
اپنے پیغام میں انہوں نے لکھا کہ انتہائی دکھ کے ساتھ آپ سب کو آگاہ کرنا چاہتا ہوں کہ کئی ماہ کے غور و خوض کے بعد میں نے فلم راولپنڈی ایکسپریس اور اس کے میکرز سے علیحدگی کا فیصلہ کیا اور اپنی مینجمنٹ، قانونی ٹیم کے ذریعے معاہدہ ختم کر دیا ہے۔
شعیب اختر کا کہنا تھا کہ میں نے اس پروجیکٹ میں شامل رہنے کے لئے کافی کوشش کی لیکن بدقسمتی سے معاملات بہتر نہ ہو سکے، احسن طریقے سے اختلافات کے حل میں ناکامی اور معاہدے کی بار بار خلاف ورزیوں کے باعث بالآخر مجھے تعلقات منقطع کرنے پڑے۔
سابق کرکٹر نے فلم میکرز اور انتظامیہ کو متنبہ کرتے ہوئے مزید کہا کہ اگر وہ ان کی زندگی پر فلم بناتے رہے اور ان کے نام اور زندگی سے جڑے واقعات کو کسی بھی حوالے سے استعمال کرتے رہے تو ان کے خلاف سخت قانونی کارروائی عمل میں لائیں گے۔