کراچی: (ویب ڈیسک) آئی جی سندھ نے گزشتہ رات کراچی پولیس آفس پر حملے کی تحقیقات کیلئے 5 رکنی کمیٹی قائم کر دی جس کے سربراہ ڈی آئی جی سی ٹی ڈی ذوالفقار لاڑک ہوں گے۔
کمیٹی میں ڈی آئی جی ساؤتھ عرفان بلوچ، ڈی آئی جی سی آئی اے کریم خان، ایس ایس پی سی ٹی ڈی اور انچارج سی ٹی ڈی راجہ عمر خطاب کو شامل کیا گیا ہے، اس کے علاوہ کمیٹی دوسرے کسی بھی ممبر کو تفتیش میں مدد کیلئے خود شامل کر سکے گی۔
واضح رہے کراچی پولیس آفس میں 3 دہشت گردوں نے گزشتہ روز حملہ کیا تھا، جس کے بعد قانون نافذ کرنے والے اداروں نے آپریشن کر کے حملے کو ناکام بنا دیا، فائرنگ کے تبادلے میں 3 دہشت گرد ہلاک جبکہ رینجرز کے سب انسپکٹر تیمور اور پوليس اہلکار غلام عباس سميت 4 افراد شہيد ہوئے تھے۔
آپريشن میں رینجرز کے لیفٹیننٹ کرنل جواد، ایس ایس یو کے ڈی ايس پی حاجی عبد الرزاق سمیت 19 افراد زخمی ہوئے تھے جن کو ہسپتال میں طبی امداد دی جا رہی ہے، کلیئرنس آپریشن میں شریک اہلکاروں نے دہشت گردوں کو ہلاک کرنے کے بعد اللہ اکبر کے بلند نعرے بھی لگائے۔
دہشت گردوں میں سے ایک کا تعلق لکی مروت اور دوسرے کا شمالی وزیرستان سے ہے جبکہ تیسرے کے حوالے سے تفتیش جاری ہے، ابتدائی تحقیقات کے مطابق دہشت گرد شام 7 بجے کے قريب پوليس کی ورديوں ميں عقبی راستے سے پوليس آفس ميں داخل ہوئے تھے۔
کراچی پولیس آفس پر حملے کی تحقیقات کیلئے 5 رکنی کمیٹی قائم کر دی گئی
