پنجاب حکومت کا 9 مئی کے واقعات میں ملوث گرفتار ملزمان سے متعلق اہم فیصلہ

لاہور:(ویب ڈیسک) پنجاب حکومت نے 9 مئی کے واقعات میں ملوث گرفتار ملزمان کا جیل میں ہی ٹرائل کرنے کافیصلہ کیا ہے۔ 9مئی کے واقعات میں ملوث ملزمان کیخلاف قانونی کارروائیوں پرپیشرفت کاجائزہ لے لینے کے لیے نگران وزیر اعلیٰ پنجاب محسن نقوی کی زیر صدارت اجلاس ہوا ، جس میں فیصلہ کیا گیا کہ 9 مئی کےواقعات میں ملوث ملزمان کا جیل کے اندر ہی ٹرائل کیا جائے گا جبکہ ملزمان کےخلاف انسداد دہشت گردی ایکٹ کے تحت مقدمات کی سماعت روزانہ ہوگی۔ اس موقع پر وزیر اعلیٰ کا کہنا تھا کہ کسی شر پسند کو معاف نہیں کیا جائے گا اور کسی بے گناہ کو سزا نہیں ہو گی،مفرور شرپسندوں کو قانون کے کٹہرے میں لانے کیلئے کارروائیاں تیز کی جائیں۔ نگران وزیر اعلیٰ کو حکام کی جانب سے بتایا گیا کہ تفتیش کے دوران بے گناہ ثابت ہونے پر 200 افراد کو چھوڑ دیا گیا ہے۔