گوگل نے سمارٹ فون ویڈیو کا مسئلہ حل کردیا

لاہور (نیٹ نیوز) اگر آپ کے پاس سمارٹ فون ہو تو آپ ویڈیو تو ضرور بناتے ہونگے مگر اکثر اس فوٹیج کا معیار اچھا نہیں ہوتا خاص طور پر چلتے پھرتے افراد کافی برے نظر آتے ہیں۔ اگر آپ کو بھی اس مسئلے کا سامنا ہوتا ہے تو گوگل نے سمارٹ فون سے ویڈیو کے اس سب سے بڑے مسئلے کو حل کردیا ہے۔گوگل فوٹوزایپ میں فون سے بنائی جانیوالی ویڈیوز کو خودکار طور پر سٹیبلائز کیا جاسکتا ہے اور وہ بھی ایک کلک پر۔ یہ ایپ گزشتہ روز متعارف کرائی گئی جو سمارٹ فون سے ویڈیوز بنانے کے تجربے کو بہتر بنانے میں مددگار ثابت ہوگی۔ صارفین اس فیچر سے فائدہ اٹھا سکتے ہیں، بس انہیں گوگل فوٹوز ایپ کو اپ ڈیٹ کرنا ہوگا‘ اس کے بعد جب آپ کوئی ویڈیو بنائیں تو گوگل فوٹوز ایپ میں اسے اوپن کریں اور سٹیبلائز بٹن پر کلک کریں۔ اس کے بعد یہ ایپ ویڈیو کے معیار کو بہتر بنانے کا کام خود کریگی تاہم اس کا ونڈو سائز کچھ چھوٹا ہوجائیگا۔ یہ فیچر اس وقت متعارف کرایا گیا ہے جب گزشتہ روز گوگل نے اپنے امیج سرچ کو بہتر بنا کر اسے فیشن ایبل انداز دیا تھا۔