لندن (نیٹ نیوز) برطانوی ماہرین صحت کا کہنا ہے کہ گرمی کی شدت سے بچنے کیلئے پرفیوم، سن پروٹیکشن فیکٹر اور ایکسفو لائٹنگ فیس واش کا استعمال اہم ہے۔ یونیورسٹی کالج لندن کے صحت اور حسن کے ماہرین کا کہنا ہے کہ گرمی کی شدت کئی مسائل پیدا کرسکتی ہے اسی لیے چند مفید مشوروں پر عمل کرکے گرمیوں میں بھی تازہ دم دکھائی دیا جا سکتا ہے۔ ماہرین کا کہنا ہے کہ گرمی کی شدت میں تروتازہ رہنے کیلئے ہلکی خوشبو کا انتخاب کیا جانا بہتر ہے۔ گرمیوں میں سن سکرین کی افادیت سے انکار نہیں کیا جا سکتا‘ اس کا باقاعدہ استعمال جلد جھلسنے اور جلدی سرطان سے بچنے کیلئے ضروری ہے۔ ماہرین نے مزید مشورہ دیتے ہوئے کہا کہ گرمیوں کے موسم میں ہلکے کپڑوں کے استعمال کیساتھ ساتھ جسم کو صاف ستھرا رکھنے سے بھی گرمی کے مضر اثرات سے محفوظ رہا جا سکتا ہے۔
