جنوبی افریقہ ویسٹ انڈیز کو9وکٹوں سے ہراکرسیمی فائنل دوڑمیں شامل ہوگیا

جنوبی افریقہ نے 177 رنز کا ہدف 16.1 اوورز میں مخص ایک وکٹ کے نقصان پر باآسانی حاصل کرلیا، جنوبی افریقہ کی جانب سے کپتان ایڈن مارکرم نے 82 رنز کی ناقابل شکست اننگز کھیلی، کوئنٹن ڈی کاک 47 رنز بناکر آؤٹ ہوئے جبکہ ریان رکیلٹن بھی 45 رنز کیساتھ ناٹ آؤٹ رہے۔

قبل ازیں احمدآباد کے نریندر مودی سٹیڈیم میں کھیلے گئے میچ میں جنوبی افریقہ نے ویسٹ انڈیز کے خلاف ٹاس جیت کر پہلے باؤلنگ کا فیصلہ کیا اور مقررہ 20 اوورز میں 8 وکٹوں کے نقصان پر 176 رنز بنائے۔

ویسٹ انڈین نے ابتدائی 2 اوورز میں اچھا آغاز کیا تاہم اس کے بعد وقفے وقفے سے وکٹیں گرنے کا سلسلہ شروع ہوگیا، 10.2 اوورز میں 83 رنز پر ساتویں وکٹ گرنے کے بعد جیسن ہولڈر اور روماریو شیفرڈ نے ٹی ٹوئنٹی انٹرنیشنل میچز میں آٹھویں وکٹ کے لیے 89 رنز کی ریکارڈ شراکت قائم کی۔

جیسن ہولڈر 49 رنز بناکر آخری اوور میں رن آؤٹ ہوگئے جبکہ روماریو شیفرڈ 52 رنز بناکر ناقابل شکست رہے، یہ ان کی پہلی ٹی ٹوئنٹی انٹرنیشنل نصف سنچری ہے۔

جنوبی افریقا کی جانب سے لنگی نگیدی نے 3، کگیسو ربادا اور کوربن بوش نے 2،2 وکٹیں حاصل کیں۔

واضح رہے کہ سُپر ایٹ مرحلے میں ویسٹ انڈیز نے اپنے پہلے میچ میں زمبابوے کو 107 رنز سے شکست دی تھی جبکہ جنوبی افریقا نے بھارت کے خلاف 76 رنز سے کامیابی حاصل کی تھی۔