پاکستان کے سابق فاسٹ بولر شعیب اختر نے اپنے بچپن، کرکٹ کے سفر اور سابق کپتان عمران خان سے تعلق کے حوالے سے جذباتی گفتگو کی ہے۔
جیو کے پروگرام ’’ہنسنا منع ہے‘‘ میں گفتگو کرتے ہوئے شعیب اختر نے بتایا کہ بچپن میں تقریباً 9 سال کی عمر تک انہیں بھاگنا نہیں آتا تھا، جس کی وجہ سے دوسرے بچے انہیں تنگ کرتے تھے اور کہتے تھے کہ وہ بھاگ بھی نہیں سکتے۔
شعیب اختر کے مطابق انہیں بچپن میں کئی طبی مسائل کا سامنا تھا، تاہم انہوں نے ہمت نہیں ہاری۔ انہوں نے کہا کہ پہلے انہوں نے بھاگنا سیکھا، پھر دوڑنا شروع کیا اور اس کے بعد ’’اڑنا‘‘ شروع کردیا۔
سابق فاسٹ بولر نے بتایا کہ کرکٹ کے سفر کے دوران ان کے ذہن میں یہ خواہش تھی کہ ایک دن وہ عمران خان کے ساتھ کھیلیں گے۔ تاہم جب وہ اس مقام تک پہنچے تو عمران خان کرکٹ سے ریٹائر ہوچکے تھے۔
شعیب اختر نے کہا کہ اس کے بعد انہوں نے سوچا کہ اگر عمران خان کے ساتھ کھیلنے کا موقع نہیں ملا تو کم از کم ان سے ضرور ملاقات کریں گے۔
انہوں نے عمران خان کو اپنے کرکٹ کیریئر کا اہم محرک قرار دیتے ہوئے کہا کہ انہوں نے کرکٹ ہی عمران خان کی وجہ سے شروع کی تھی۔
شعیب اختر کا کہنا تھا کہ عمران خان نے پوری زندگی ان سے بہت محبت کی اور آج بھی ان کے دل میں عمران خان کے لیے بہت احترام اور محبت موجود ہے۔
سابق فاسٹ بولر نے جذباتی انداز میں کہا کہ ’’اب بھی ان سے ملنے کا دل چاہتا ہے۔‘‘
شعیب اختر کی یہ گفتگو ان کے کرکٹ کے سفر میں پیش آنے والی مشکلات اور عمران خان سے ان کی دیرینہ وابستگی کی عکاسی کرتی ہے۔
