بنگلہ دیش کی معروف عالمی سیاح اور مہم جو نجم النہار نے 185 ممالک کا سفر مکمل کرکے تاریخ رقم کردی۔ وہ یہ سنگِ میل حاصل کرنے والی پہلی بنگلہ دیشی اور دنیا کی پہلی مسلم خاتون قرار دی گئی ہیں۔
نجم النہار نے 7 اگست 2026 کو بھوٹان کا سفر کرکے اپنے 185ویں ملک کا سفر مکمل کیا۔ ان کا عالمی سفر تقریباً 26 سال پر محیط ہے، جس کے دوران انہوں نے دنیا کے مختلف خطوں میں بنگلہ دیش کا سرخ و سبز پرچم لہرایا۔
رپورٹس کے مطابق نجم النہار نے دنیا بھر میں 1,294 سے زائد مقامات پر بنگلہ دیش کا قومی پرچم لہرایا، جن میں بلند پہاڑ، دشوار گزار علاقے، صحرا، سمندر، جزائر اور تاریخی مقامات شامل ہیں۔ وہ متعدد ممالک میں سڑک کے ذریعے بھی سفر کرچکی ہیں اور دنیا کے تمام خشکی میں گھرے ممالک کا سفر اوورلینڈ روٹس سے کرنے کا دعویٰ کرتی ہیں۔
نجم النہار نے اپنے عالمی سفر کا آغاز 2000 میں بھارت میں ایک بین الاقوامی ایڈونچر پروگرام میں شرکت سے کیا تھا۔ انہوں نے 2018 میں زمبابوے کے سفر کے ساتھ 100 ممالک کا سنگِ میل عبور کیا، 2021 میں ساؤ ٹومے اینڈ پرنسپے کے دورے سے تعداد 150، 2024 میں وانواتو کے سفر سے 175 اور دسمبر 2025 میں بہاماس کے سفر سے 184 ممالک مکمل کیے تھے۔
اپنے سفر کے ذریعے نجم النہار دنیا بھر میں بنگلہ دیش کی ثقافت، تاریخ اور ورثے کو اجاگر کرنے کے ساتھ ساتھ امن، ماحولیاتی تحفظ اور کم عمری کی شادی کے خاتمے کے پیغامات بھی اجاگر کرتی رہی ہیں۔ وہ دنیا کے مختلف تعلیمی اداروں میں بھی خطاب کرچکی ہیں اور نوجوانوں کو حوصلے، قیادت اور خود اعتمادی کا پیغام دیتی ہیں۔
ان کی عالمی خدمات اور سفر کے اعتراف میں انہیں متعدد اعزازات بھی مل چکے ہیں، جن میں 2019 کا Peace Torch Bearer Award اور مختلف ممالک کی جانب سے دیے گئے اعزازی القابات شامل ہیں۔
نجم النہار کی 185 ممالک کا سفر مکمل کرنے کی کامیابی کو بنگلہ دیش کے لیے فخر اور دنیا بھر کی خواتین کے لیے عزم، حوصلے اور ثابت قدمی کی مثال قرار دیا جا رہا ہے۔
