وزیر داخلہ سندھ کا میئرکراچی کے ہمراہ مختلف تھانوں کا دورہ

کراچی(این این آئی) وزیر داخلہ سندھ ضیاء الحسن لنجار اور میئر کراچی مرتضیٰ وہاب نے رات گئے شہر کے مختلف تھانوں کا اچانک دورہ کیا، جہاں ڈیوٹی سے غیر حاضر، بغیر وردی موجود اور فرائض میں غفلت برتنے والے پولیس افسران و اہلکاروں کے خلاف کارروائی کرتے ہوئے متعدد اہلکاروں کو معطل کردیا گیا۔وزیر داخلہ سندھ نے سب سے پہلے فیروز آباد تھانے کا اچانک دورہ کیا، جہاں انہوں نے تھانے میں موجود شہریوں سے ان کے مسائل دریافت کیے اور متعلقہ حکام کو فوری طور پر مسائل حل کرنے کی ہدایت کی۔ انہوں نے مختلف مقدمات میں زیرحراست افراد سے بھی پولیس کے رویے اور دیگر امور کے بارے میں معلومات حاصل کیں۔فیروز آباد تھانے میں بغیر وردی موجود عملے کے خلاف کارروائی کرتے ہوئے سب انسپکٹر وسیم کو معطل کرکے ایک درجہ تنزلی کردی گئی، جبکہ کانسٹیبل عبدالوہاب کو بھی معطل کردیا گیا۔بعد ازاں وزیر داخلہ سندھ عزیز بھٹی تھانے پہنچے، جہاں ایس ایچ او انسپکٹر شمشاد چاچڑ کی عدم موجودگی پر انہیں معطل کردیا گیا۔ وزیر داخلہ نے تھانے کا روزنامچہ اور دیگر سرکاری ریکارڈ بھی چیک کیا۔ذرائع کے مطابق عزیز بھٹی تھانے کے ایس ایچ او سمیت تقریباً پورے عملے کو معطل کرنے کے احکامات جاری کیے گئے، جبکہ متعدد اہلکار ڈیوٹی کے دوران پولیس یونیفارم میں موجود نہیں تھے۔