مقامی حکومتوں کو مالی اختیارات دیئے جائیں’ ایم کیو ایم کا وزیراعظم کو خط

کراچی(این این آئی) ایم کیو ایم پاکستان نے مقامی حکومتوں کو مالی اختیارات دینے کے مطالبے پر وزیراعظم شہباز شریف کو خط لکھ دیا۔رہنما ایم کیو ایم پاکستان نسرین جلیل کی جانب سے لکھے گئے خط کی کاپیاں وفاقی وزیر خزانہ، آئی ایم ایف سربراہ اور عالمی بینک کے صدر کو بھی ارسال کی گئی ہیں۔خط میں وزیراعظم سے مقامی حکومتوں کی مالی خودمختاری کے معاملے پر ذاتی توجہ دینے اور ان کی مالی ضروریات پوری کرنے کیلئے خصوصی انتظامات کرنے کا مطالبہ کیا گیا ہے۔خط کے مطابق مالی خودمختاری نہ ہونے کے باعث شہری بنیادی سہولیات سے محروم ہیں، اس لیے صوبوں کے لیے قومی مالیاتی کمیشن میں اپنائے گئے مالی مساوات کے اصول مقامی حکومتوں تک بھی توسیع دیے جائیں۔ایم کیو ایم نے مطالبہ کیا کہ میٹروپولیٹن شہروں کے لیے ”میٹروپولیٹن سروس برڈن” کو بھی قومی مالیاتی کمیشن میں وسائل کی تقسیم کا معیار بنایا جائے۔نسرین جلیل نے کہا کہ مالی اختیارات کی منتقلی وزیراعلیٰ کے دروازے پر ختم نہیں ہونی چاہیے۔