کراچی میں مختلف پولیس مقابلے ، ایک ڈاکوہلاک، 6 زخمیوں سمیت14 ملزمان گرفتار

کراچی(این این آئی) شہر کے مختلف علاقوں میں پولیس اور ڈاکوؤں کے درمیان مبینہ مقابلوں میں ایک ڈاکو ہلاک جبکہ 14 ملزمان کو گرفتار کرلیا گیا، جن میں 6 زخمی حالت میں گرفتار کیے گئے۔ پولیس کے مطابق ایس آئی یو کی پولیس پارٹی کا صدر میں پارسی اسکول کے قریب مبینہ مقابلہ ہوا، جس میں عبیدالرحمن نامی ڈاکو زخمی حالت میں گرفتار ہوا، جسے جناح ہسپتال منتقل کر دیا گیا۔ شارع نورجہاں پولیس نے نارتھ ناظم آباد بلاک آر، کٹی پہاڑی کے قریب مبینہ مقابلے میں عبدالرحمن کو زخمی حالت میں گرفتار کیا، جبکہ خواجہ اجمیر نگری پولیس نے رحمانیہ موڑ نارتھ کراچی کے قریب مقابلے کے بعد ہاشم نامی ڈاکو کو زخمی حالت میں گرفتار کیا۔ پولیس کے مطابق ہاشم سے اسلحہ اور دیگر سامان برآمد ہوا۔ عزیز بھٹی پولیس کا گلشن اقبال بلاک 13ـC، غفور اپارٹمنٹ کے قریب مبینہ مقابلہ ہوا، جس میں ایک ڈاکو ہلاک اور اس کا ساتھی شعیب زخمی حالت میں گرفتار کرلیا گیا۔ پولیس کے مطابق ملزمان کی فائرنگ سے کانسٹیبل محمد عیسیٰ بھی پاؤں میں گولی لگنے سے زخمی ہوا۔ قائد آباد پولیس نے لانڈھی ریڑھی روڈ، احسان گراؤنڈ کے قریب مبینہ مقابلے کے بعد نسیم اللہ اور شیر حسین کو زخمی حالت میں گرفتار کیا۔ دوسری جانب سمن آباد پولیس کا فیڈرل بی ایریا بلاک 18، گجر نالے کے قریب مبینہ مقابلہ ہوا، جس میں امجد علی زخمی حالت میں گرفتار جبکہ اس کے ساتھی علیم رضا کو بھی حراست میں لے لیا گیا۔