کراچی (آئی این پی) وزیراعلی سندھ مراد علی شاہ نے کہا ہے کہ سندھ بھر میں 838 نئے اور ازسرنو تعمیر شدہ سکول تکمیل کے قریب ہیں، ان سکولوں کی تکمیل کے ساتھ ہی داخلہ مہم شروع کی جائے اور ہر مکمل سکول کو پہلے ہی تعلیمی سال سے فعال بنایا جائے۔ وزیراعلی سندھ مراد علی شاہ کی زیرصدارت وزیراعلی ہاس میں تعلیمی انتظامی اداروں سے متعلق اجلاس ہوا، جس میں صوبائی وزیر تعلیم سید سردار علی شاہ، چیف سیکرٹری سندھ آصف حیدر شاہ، وزیراعلی کے پرنسپل سیکرٹری آغا واصف، چیئرمین پلاننگ اینڈ ڈویلپمنٹ بورڈ نجم شاہ، سیکرٹری سکول ایجوکیشن زاہد عباسی، ڈائریکٹر جنرل پی پی پی یونٹ اسد ضامن، پروجیکٹ ڈائریکٹر ایس ایس ای آئی پی رضوان سومرو اور دیگر اعلی حکام نے شرکت کی۔ اجلاس میں وزیراعلی سندھ کو صوبے میں جاری سکولوں کے تعمیر، بحالی اور اپ گریڈیشن کے منصوبوں پر تفصیلی بریفنگ دی گئی،بتایا گیا کہ ایشیائی ترقیاتی بینک کے تعاون سے سندھ میں 838 سکول تعمیر، اپ گریڈ یا بحال کیے جا رہے ہیں،ان میں اصل ایس ایس ای آئی پی منصوبے کے تحت 116 نئے سیکنڈری سکول جبکہ سیلاب بحالی پروگرام کے تحت 722 موسمیاتی اثرات سے محفوظ سکول شامل ہیں۔ بریفنگ کے مطابق اصل ایس ایس ای آئی پی منصوبے کے تحت 64 اسکول دسمبر 2026 تک مکمل ہوجائیں گے جبکہ باقی 52 اسکول جون 2027 تک مکمل کرنے کا ہدف مقرر کیا گیا ہے،اس طرح منصوبے کے تحت کل 116 اسکول مکمل ہوں گے، سیلاب بحالی منصوبے کے تحت پانچ اضلاع میں 722 تباہ شدہ اسکول دوبارہ تعمیر کیے جا رہے ہیں، جنہیں موسمیاتی اثرات سے محفوظ ڈیزائن کے تحت اپ گریڈ کیا جا رہا ہے۔
