ٹنڈوالہ یار: شادی کا کھانا کھانے سے 400 افراد کی حالت غیر

کراچی،ٹنڈوالہ یار (این این آئی) ٹنڈوالہ یار میں شادی کی ایک تقریب میں کھانا کھانے کے بعد دلہا، دلہن سمیت 400 کے قریب افراد کی حالت غیر ہوگئی، متاثرہ افراد میں خواتین اور بچوں کی بڑی تعداد بھی شامل ہے۔ مریضوں کی بڑی تعداد مقامی اسپتال پہنچنے پر ایمرجنسی نافذ کردی گئی، جبکہ حکام نے واقعے کی وجوہات جاننے کیلئے تحقیقات شروع کردی ہیں۔ذرائع کے مطابق گزشتہ رات شادی کی تقریب میں کھانا کھانے کے بعد متعدد افراد کی حالت بگڑ گئی اور بعض افراد بے ہوش ہوگئے۔ متاثرہ افراد کو فوری طور پر مقامی اسپتال منتقل کیا گیا جہاں مریضوں کی بڑی تعداد پہنچنے کے باعث طبی عملے کو ہنگامی بنیادوں پر متحرک کردیا گیا۔واقعے کی اطلاع ملنے پر طبی ٹیموں کو فوری طور پر تعینات کیا گیا۔ اسپتال ذرائع کے مطابق زیادہ تر متاثرہ افراد کو طبی امداد فراہم کرنے کے بعد ڈسچارج کردیا گیا، جبکہ بعض مریضوں کو مزید طبی نگرانی میں رکھا گیا۔حکام نے شادی کی تقریب میں فراہم کیے گئے کھانے کے نمونے حاصل کرکے لیبارٹری ٹیسٹ کیلئے بھجوا دیے ہیں۔ حکام کا کہنا ہے کہ کھانا کھانے کے بعد افراد کی طبیعت خراب ہونے کی حتمی وجہ لیبارٹری رپورٹس سامنے آنے کے بعد معلوم ہوسکے گی۔وزیراعلیٰ سندھ سید مراد علی شاہ نے ٹنڈوالہ یار میں ناقص کھانا کھانے سے سیکڑوں افراد کی حالت غیر ہونے کے واقعے کا نوٹس لیتے ہوئے آئی جی سندھ پولیس اور کمشنر حیدرآباد سے تفصیلات اور واقعے کی مکمل رپورٹ طلب کرلی۔