ایم پی او کی دفعات 3 اور 16 کو کالعدم قرار دینے کیلئے کیس مقرر کرنیکی ہدایت

لاہور (کورٹ رپورٹر) لاہور ہائیکورٹ نے مینٹیننس آف پبلک آرڈر (ایم پی او) کی دفعات3 اور 16 کو کالعدم قرار دینے کیلئے ایم پی
اے شفیع جان کی جلد سماعت کی درخواست منظور کرتے ہوئے کیس مقرر کرنے کی ہدایت کر دی۔ عدالت نے وکیل اظہر صدیق کی جانب سے مرکزی درخواست کی آج ہی سماعت مقرر کرنے کی استدعا مسترد کر دی۔ وکیل اظہر صدیق نے موقف اختیار کیا کہ تین مرتبہ درخواستیں دے چکے ہیں لیکن کیس ارجنٹ سماعت کے لیے مقرر نہیں ہو رہا، استدعا ہے کہ مرکزی کیس کو آج ہی سماعت کے لیے مقرر کیا جائے۔ عدالت نے ریمارکس دیئے کہ میں چیف جسٹس نہیں ہوں جو آفس کو کیس فکس کرنے کی ہدایت دوں، وکیل اظہر صدیق نے کہا کہ بڑی مشکل ہے، کیس فکس نہیں ہو رہا، عدالت نے کہا کہ فکر نہ کریں، ہم آپ کی مشکل آسان کریں گے، وکیل نے مزید کہا کہ انہوں نے نظربندی کے15 ہزار آرڈر ختم کرائے ہیں، لاہور ہائیکورٹ کے مختلف ججز کی جانب سے نظر بندیوں کے حوالے سے مختلف فیصلے سامنے آئے ہیں، جسٹس امجد رفیق نے بھی ہزاروں نظر بندی کے آرڈر ختم کیے ہوں گے۔ جسٹس عبہر گل خان نے ریمارکس دیئے کہ تمام ججز قابل احترام ہیں آپ یہاں کسی کی بات نہ کریں۔ وکیل اظہر صدیق نے کہا کہ ٹیکنیکلٹیز میں پڑ کر انصاف کا راستہ نہیں روکا جاسکتا۔ عدالت نے استفسار کیا کہ آپ جو دلائل دے رہے ہیں کیا یہ چیزیں اس درخواست میں موجود ہیں؟