شانگلہ آسمائی بجلی گرنے اور موسلادھار بارشوںنے تباہی مچا دی 2 بچے بہ گئے خاتون زخمی

شانگلہ(ڈسٹرکٹ رپورٹر)شانگلہ کے تحصیل بشام میں آسمائی بجلی گرنے اور موسلادھار بارشوں نے تباہی مچا دی، اچانک آنے والے سیلابی ریلے کی زد میں آکر 2 بچے بہہ گئے ایک خاتون زخمی ہوگئی جبکہ رہائشی مکانات، پولیس سٹیشن بشام سمیت متعدد عمارتوں اور املاک کو شدید نقصان پہنچا۔ سیلابی ریلے سے درجنوں گاڑیاں متاثر، بجلی کے کھمبے اور تاریں ٹوٹ گئیں جبکہ شاہراہ قراقرم بھی بشام کے مختلف مقامات پر سیلابی ریلوں سے متاثر ہوئی رات گئے تک شاہراہ قراقرم ٹریفک کیلئے مکمل طور پر بند رہی۔بشام تاالپوری روڈبھی کئی مختلف مقامات پر لینڈ سلائیڈنگ سے متاثر ہوئی۔ بشام میں موسلادھار بارش کے بعد اچانک مقامی نالے میں شدید سیلابی ریلہ آگیا جس میں مٹی، پتھر اور پانی کا تیز بہاؤ شامل تھا۔ سیلابی ریلے نے اپنے راستے میں آنے والی متعدد املاک کو شدید نقصان پہنچایا۔ مقامی نالے میں آنے والے اچانک سیلابی ریلے کی زد میں آکر دو بچے بہہ گئے جبکہ ایک خاتون بھی زخمی ہوگئی جسے طبی امداد کیلئے ہسپتال منتقل کیا گیا۔سیلابی ریلے کے باعث پولیس سٹیشن بشام سمیت متعدد رہائشی مکانات اور دیگر عمارتوں کو بھی شدید نقصان پہنچاجبکہ متعدد گاڑیاں بھی ریلے کی زد میں آکر متاثر ہوئیں۔ سیلابی پانی اور ملبہ سڑکوں پر آنے سے آمدورفت کا نظام درہم برہم ہوگیا اور شہریوں کو شدید مشکلات کا سامنا کرنا پڑا۔بارش اور سیلابی ریلے کے باعث بشام میں بجلی کا نظام بھی بری طرح متاثر ہوا، متعدد بجلی کے کھمبے گر گئے اور تاریں ٹوٹنے سے مختلف علاقوں میں بجلی کی فراہمی متاثر رہی۔ دوسری جانب شاہراہ قراقرم بھی بشام کے مختلف مقامات پر سیلابی ریلوں، مٹی اور پتھروں کے باعث متاثر ہوئی جس کے نتیجے میں رات گئے تک شاہراہ قراقرم ٹریفک کیلئے مکمل طور پر بند رہی اور دونوں اطراف گاڑیوں کی قطاریں لگ گئیں۔تحصیل بشام کے متعدد بالائی علاقوں اور گردونواح میں بھی سیلابی ریلوں نے لنک سڑکوں کو شدید نقصان پہنچایا کئی مقامات پر سڑکیں مٹی، پتھروں اور سیلابی پانی کی زد میں آنے سے بند ہوگئیں۔ وادی کے مختلف علاقوں میں بجلی کا نظام بھی شدید متاثر رہا اور شہریوں کو بجلی کی بندش کا سامنا کرنا پڑا۔ادھر شانگلہ کے دیگر علاقوں الپوری، پورن، چکیسر سمیت مختلف علاقوں میں بھی وقفے وقفے سے موسلادھار بارش اور ژالہ باری ہوئی جس سے موسم سرد ہوگیا۔ موسلادھار بارشوں کے باعث متعدد لنک سڑکوں کو بھی نقصان پہنچا اور کئی رابطہ سڑکیں بند رہیں جس سے مقامی آبادی کو آمدورفت میں مشکلات کا سامنا کرنا پڑا۔بارش اور سیلابی ریلوں کے باعث شانگلہ بھر میں شہریوں میں تشویش پائی جاتی ہے جبکہ متاثرہ علاقوں میں سڑکوں، بجلی کے نظام اور رہائشی املاک کو پہنچنے والے نقصانات کے باعث معمولات زندگی متاثر ہوئے ہیں۔۔