راولپنڈی(خصوصی رپورٹر) تحریک انصاف کے 27 ستمبر کو متوقع اسلام آباد مارچ کے پیش نظر پنجاب حکومت نے انتظامات انتہائی سخت کر دیئے یں اس مقصد کے لئے راولپنڈی اسلام کی طرف آنے والے بیشتر بیرونی داخلی راستے کنٹینرز اور بھاری رکاوٹوں کے ذریعے مکمل بند کردئیے گئے ہیں جبکہ رہ جانے والے راستوں کو آج شام تک بند کردیا جائے گا ضلعی انتظامیہ اور پولیس نے فیض آباد میں تمام ٹرانسپورٹ اڈوں اور ہوٹلوں کو بھی بند کروادیا ہے جبکہ فیض آباد کے قریب واقع بارانی زرعی یونیورسٹی کو بھی غیر معینہ مدت تک بند کرواکے ہاسٹل خالی کروا لئے گئے ہیں جبکہ سکستھ اور سیونتھ روڈ سمیت تھانہ صادق آباد اور تھانہ نیوٹان کی حدود میں واقع تمام نجی ہاسٹل خالی کروا کے انہیں بھی غیر معینہ مدت تک بند کردیا گیا ہے پولیس ذرائع کے مطابق فیض آباد اڈے کے اطراف موجود ہوٹلوں کو بند کروا دیا گیا ہے جبکہ ریسٹورنٹس مالکان سمیت دیگر دکانداروں کو بھی کاروبار پیشگی بند کرنے کی ہدایات جاری کی گئی ہیں ادھر اطلاعات کے مطابق پنجاب اور خیبرپختونخوا کو ملانے والے اٹک خورد پل کو دونوں اطراف سے کنٹینروں اور بھاری رکاوٹوں کے ساتھ مکمل بند کرنے کے علاوہ پیدل آمدورفت بھی روک دی گئی ہے اسی طرح جڑواں شہروں کی انتظامیہ اور پولیس کی جانب سے اسلام آباد ریڈ زون، شاہراہِ دستور، 26 نمبر چونگی، اسلام آباد ایکسپریس وے سمیت اہم مقامات کو مکمل سیل کیا جارہا ہے جبکہ فیض آباد فلائی اوور، کھنہ پل، کورال فلائی اوور، اور آئی جے پی روڈ سمیت دیگر اندرونی راستوں کو بھی بوقت ضرورت فوری سیل کردیا جائے گا اس مقصد کے لئے سینکڑوں کی تعداد میں کنٹینرز متعلقہ جگہوں تک پہنچا دئیے گئے ہیں جبکہ تمام اہم مقامات پر سول کپڑوں میں پولیس اور قانون نافذ کرنے والے اداروں کے اہلکار مسلسل نگرانی کررہے ہیں حکومت پنجاب کی درخواست پر وفاقی وزارت داخلہ نے پنجاب میں رینجرز کو قانونی اختیارات کے تحت مکمل معاونت فراہم کرنے کی اجازت دے دی پاکستان رینجرز آرڈیننس 1959 کی دفعات7 (b) اور10 جبکہ انسداد دہشت گردی ایکٹ 1997 کی دفعات 4 اور 5 کے تحت مطلوبہ تعداد میں رینجرز تعینات کی گئی ہے لانگ مارچ کے دوران ممکنہ شدت پسندی، انتشاری اور مسلح جتھوں کے حملوں پر رینجرز اور پولیس اپنے دفاع کے لئے ہر مناسب اور ضروری جوابی ایکشن لینے کی مجاز ہوگی ذرائع کے مطابق رینجرز اور پولیس کو کسی بھی پرتشدد سرگرمی یا خطرے سے نمٹنیکیلئے مکمل اقدامات کی ہدایت کی گئی ہے جس کے تحت تعینات رینجرز اہلکار امن و امان برقراررکھنے اور سکیورٹی معاونت کے لئے تمام ضروری ذمہ داریاں انجام دیں گے ادھر جڑواں شہروں کے عوام نے تحریک انصاف کے لانگ مارچ کی کال کے موقع پر راستوں کی بندش پر شدید تشویش کا اظہار کرتے ہوئے کہا ہے کہ ملک میں احتجاج اور دھرنوں کی پرتشدد سیاست کے مکمل خاتمے کے لئے فوری قانون سازی کی ضرورت ہے شہریوں کے مطابق اس وقت ملک معاشی طور پر پہلے ہی ہچکولے کھا رہا ہے عوام دو وقت کی روٹی کے لئے مجبور ہیں ان حالات میں مارچ، احتجاج اور دھرنے کسی طور بھی ملکی مفاد میں نہیں شہریوں نے مطالبہ کیا کہ تحریک انصاف اپنے احتجاج کو خیبرپختونخوا تک محدود رکھے۔
