گوجر خان (نمائندہ خبریں)پاکستان پیپلز پارٹی کسان ونگ ضلع راولپنڈی کے صدر راجہ اختر حسین نے تحصیل آفس گوجر خان میں جاری بدعنوانی اور رشوت ستانی کے نظام پر شدید تشویش کا اظہار کرتے ہوئے فوری کارروائی کا مطالبہ کیا ہے اپنے ایک پریس بیان میں راجہ اختر حسین نے کہا کہ تحصیل آفس گوجر خان اس وقت رشوت کا گڑھ بن چکا ہے، جہاں رجسٹری برانچ میں تحصیلداران کے ریڈر، ریٹائرڈ ملازمین اور پرائیویٹ افراد مل کر قانونی عمل کو معطل کر کے رشوت کا بازار گرم کیے ہوئے ہیں۔ انہوں نے کہا کہ دیہات اور شہر سے آنے والے شہریوں کے ساتھ ناروا سلوک اختیار کیا جاتا ہے اور جب تک یہ نام نہاد پرائیویٹ لوگ اور ریٹائرڈ ملازمین دفاتر میں براجمان رہیں گے، عوام کو دونوں ہاتھوں سے لوٹا جاتا رہے گا اور ان کی ذلت و خوار جاری رہے گی۔ انہوں نے مزید انکشاف کیا کہ رجسٹری برانچ میں مختلف نوعیت کی رجسٹریوں کے لیے الگ الگ ریٹ مقرر کر رکھے ہیں، جبکہ پلاٹ، مکان اور دکان کی رجسٹری کے لیے بھی مخصوص رقم طے کی گئی ہے۔ یہ تمام تر کارروائیاں محکم اینٹی کرپشن کی ناک کے نیچے ہو رہی ہیں۔ راجہ اختر حسین نے خبردار کیا کہ اگر محکم? اینٹی کرپشن نے وزیراعلیٰ پنجاب کے احکامات کے مطابق رشوت ستانی کے اس بازار کو بند نہ کرایا تو عوام کو ساتھ ملا کر بھرپور احتجاج کی کال دی جائے گی۔ انہوں نے موجودہ رکن قومی اسمبلی (MNA) اور رکن صوبائی اسمبلی (MPA) سے بھی التماس کیا کہ وہ تحصیل آفس میں مقیم ان ریٹائرڈ اور پرائیویٹ ملازمین کو فارغ کروا کے ان کے گھر بھیجیں تا کہ عوام کو اس لوٹ مار اور ذلت سے نجات مل سکے اور تحصیل آفس گوجر خان کو رشوت فری بنایا جا سکے
