خبریں کی خبر پر ایکشن، گوجر خان میں واٹر فلٹریشن پلانٹ کی صفائی کا کام شروع

گوجر خان ( نمائندہ خبریں)روزنامہ ”خبریں” کی ممتاز سطر ”جہاں ظلم وہاں خبریں” میں عوامی مسائل کی نشاندہی پر مقامی انتظامیہ نے فوری اور بھرپور ایکشن لیتے ہوئے متعدد درپیش مسائل حل کر دیے ہیں۔ سابق سٹی ڈسٹرکٹ ناظم راولپنڈی راجہ محمد جاوید اخلاص اور سابق ٹاؤن ناظم گوجر خان چوہدری محمد عظیم کے دورِ اقتدار میں قائم کردہ سکیم نمبر 1 گوجر خان کا واٹر فلٹریشن پلانٹ انتظامیہ نے بروقت کارروائی کرتے ہوئے مکمل طور پر بحال کر دیا ہے، جہاں نئی اور معیاری ٹوٹیاں نصب کر کے پانی کا ضیاع روک دیا گیا ہے اور گرد و نواح میں صفائی ستھرائی کے بہترین انتظامات یقینی بناتے ہوئے کچرا ہٹا دیا گیا ہے۔ اسی تسلسل میں روزنامہ ”خبریں” میں برقی چوکی (چوہان) نالے کی ابتر صورتحال پر خبر شائع ہوتے ہی راولپنڈی ویسٹ مینجمنٹ کمپنی (RWMC) کے اصغر خان کی ہدایات پر ٹیموں نے موقع پر پہنچ کر صفائی، کٹائی اور نالے سے کچرا ہٹانے کا عمل فوری شروع کر دیا ہے۔ اس بروقت اور موثر پیشرفت پر اہل علاقے نے اسسٹنٹ کمشنر گوجر خان، سی ای او بلدیہ، چیف آفیسر بلدیہ اور RWMC انتظامیہ کے ساتھ ساتھ نمائندہ محمد یاور منیر ملہوترہ اور روزنامہ ”خبریں” کا تہہ دل سے شکریہ ادا کرتے ہوئے زبردست خراجِ تحسین پیش کیا ہے