چکلالہ کینٹ انتظامییہ کی غفلت قبرستان بنیادی سہولیات اور صفائی ستھرائی سے محروم

راولپنڈی (عرفان چوہان سے) چکلالہ کینٹ کے علاقے کھٹانہ وارڈ نمبر 10 میں واقع قبرستان  انتظامیہ کی مبینہ غفلت اور لاپرواہی کے باعث شدید زبوں حالی کا شکار ہو گیا، قبروں کے درمیان سے گزرنے والی خراب سیوریج پائپ لائن اور گٹر کے گندے پانی نے قبرستان کا تقدس پامال کر دیا ہے، قبروں کے درمیان سے گندے پانی کا نالہ گزر رہا ہے مین ہول کھلے ہیں اور کوڑے کے ڈھیر لگے ہوئے ہیں جس سے کسی بھی وقت حادثہ پیش آنے کا خدشہ ہے۔ شہریوں کا کہنا ہے کہ چکلالہ کینٹ کے افسران کی ناک کے نیچے قبرستان بنیادی سہولیات اور صفائی ستھرائی سے محروم ہے، سیوریج پائپ لائنیں خراب پڑی ہیں اور ان سے نکلنے والا بدبودار گندا پانی قبروں کے اندر اور اردگرد جمع ہو رہا ہے، جبکہ قبرستان میں باقاعدہ صفائی نہ ہونے کے باعث کوڑا کرکٹ بھی پھینکا جا رہا ہے۔ شہریوں کے مطابق قبرستان جیسے مقدس مقام کی دیکھ بھال اور صفائی انتظامیہ کی بنیادی ذمہ داری ہے تاہم صورتحال سے ایسا محسوس ہوتا ہے کہ متعلقہ حکام نے قبرستان کو مکمل طور پر نظر انداز کر رکھا ہے اور ذمہ دار اہلکار موقع پر دکھائی نہیں دیتے۔ شہریوں اور سماجی حلقوں نے ڈائریکٹر جنرل ملٹری لینڈز اینڈ کینٹونمنٹس اور ایگزیکٹو آفیسر چکلالہ کینٹونمنٹ سے فوری نوٹس لینے کا مطالبہ کرتے ہوئے کہا ہے کہ قبرستان سے گندگی اور کوڑے کے ڈھیر فوری طور پر اٹھائے جائیں، کھلے مین ہولز کو فوری طور پر ڈھانپا جائے، خراب سیوریج پائپ لائنوں کی مرمت کی جائے اور گٹر کے پانی کا قبرستان میں داخلہ مستقل طور پر روکا جائے۔