خلیج کی سلامتی، جہاز رانی کے تحفظ اور دو ریاستی حل کی حمایت کرتے ہیں: چین

بیجنگ (این این آئی) چین کے نائب صدر ہان چیانگ نے اپنے ملک کی جانب سے خلیجی ممالک اور مشرق وسطی کی سلامتی کے لیے حمایت کی توثیق کی  اور ان پر حملوں کی مذمت کی ہے۔ انہوں نے بحری جہاز رانی کی آزادی کی ضرورت پر زور دیا۔ ہان چیانگ نے اجلاس سے خطاب کرتے ہوئے کہا کہ چین خلیجی ممالک کی سلامتی کی حمایت کرتا ہے اور ان پر حملوں کی مذمت کرتا ہے۔ ان کا یہ بیان ایک ایسے وقت میں آیا ہے جب یہ خطہ بڑھتی ہوئی عسکری کشیدگی اور بحری جہاز رانی، توانائی کی فراہمی اور بین الاقوامی تجارت کے لیے خطرات کا شاہد ہے۔ چینی نائب صدر نے مشرق وسطی کی کشیدگی سے تجارت اور توانائی کی نقل و حرکت پر پڑنے والے معاشی اثرات کے پیش نظر دنیا بھر میں سپلائی چینز کی سلامتی کو برقرار رکھنے کی ضرورت پر بھی زور دیا۔ یہ معاملہ آبنائے ہرمز میں بحری جہاز رانی میں سامنے آنے والے خلل کے ساتھ خاص اہمیت اختیار کر جاتا ہے کیونکہ آبنائے ہرمز توانائی اور عالمی تجارت کا ایک انتہائی اہم بحری راستہ ہے۔