درآمدی سامان پر غیرقانونی ٹیکس چھوٹ ‘ قومی خزانے کو 5 ارب 40 کروڑ کا نقصان

اسلام آباد (حبہ عباسی) قومی خزانے کو اربوں روپے کا نقصان پہنچانے والی ایک اور سنگین مالی بے ضابطگی سامنے آگئی۔ تازہ ترین آڈٹ رپورٹ میں انکشاف ہوا ہے کہ ایف بی آر کے مختلف فیلڈ دفاتر نے قوانین کے برعکس درآمدی سامان پر غیر قانونی ٹیکس چھوٹ اور رعایتی مراعات دے کر قومی خزانے کو 5 ارب 40 کروڑ روپے سے زائد کا نقصان پہنچایا۔آڈٹ دستاویزات کے مطابق مالی سال 2020 سے 2022 کے دوران ایف بی آر کے 14 فیلڈ دفاتر نے 5 ہزار 700 سے زائد کیسز میں سبمرسیبل پمپس، فارماسیوٹیکل خام مال اور آٹو پارٹس سمیت مختلف درآمدی اشیاء پر ایسی رعایتیں دیں جو قواعد و ضوابط کے مطابق نہیں تھیں۔ نتیجتاً کسٹم ڈیوٹی اور سیلز ٹیکس کی مد میں اربوں روپے کی وصولیاں متاثر ہوئیں۔ رپورٹ کے مطابق ان کیسز میں مجموعی طور پر 5 ہزار 405 ملین روپے سے زائد کی رقم شامل ہے، تاہم حیران کن طور پر اب تک صرف 38.94 ملین روپے کی رقم وصول یا ریگولرائز کی جا سکی ہے۔ مزید 429.90 ملین روپے کی رقم خود محکمہ تسلیم کر چکا ہے لیکن اس کی ریکوری ابھی تک مکمل نہیں ہو سکی۔ دستاویزات میں یہ بھی سامنے آیا ہے کہ 2 ارب 708 ملین روپے سے زائد مالیت کے کیسز مختلف عدالتوں میں زیرِ التوا ہیں جبکہ تقریباً 1 ارب 934 ملین روپے کی رقم ایسے معاملات میں پھنسی ہوئی ہے جہاں تاحال محکمانہ کارروائی مکمل نہیں کی جا سکی۔آڈٹ حکام نے ذمہ دار افسران کے خلاف کارروائی اور 316.93 ملین روپے کی تسلیم شدہ رقم کی فوری وصولی کی سفارش کرتے ہوئے خبردار کیا ہے کہ تاخیر سے قومی خزانے کو مزید نقصان پہنچ سکتا ہے۔ دوسری جانب ایف بی آر کا موقف ہے کہ 40 کروڑ روپے سے زائد کی ریکوری کا عمل جاری ہے جبکہ 3 ارب روپے سے زائد کے ٹیکس چھوٹ کے کیسز مختلف مراحل میں زیرِ غور ہیں۔ ڈیپارٹمنٹل آڈٹ کمیٹی نے ستمبر 2026 تک ہونے والے 7 اجلاسوں میں اس معاملے کا جائزہ لیتے ہوئے متعلقہ حکام کو عدالتی کیسز کی موثر پیروی اور ریکوری کا عمل تیز کرنے کی ہدایت کی ہے۔ تاہم اربوں روپے کے اس معاملے پر پبلک اکائونٹس کمیٹی کی سب کمیٹی میں تاحال باقاعدہ بحث نہ ہونا بھی کئی سوالات کو جنم دے رہا ہے۔سوال یہ ہے کہ اگر آڈٹ رپورٹ میں قومی خزانے کو 5 ارب روپے سے زائد نقصان کی نشاندہی ہو چکی ہے تو ذمہ داروں کا تعین کب ہوگا، ریکوری کب مکمل ہوگی اور ٹیکس دہندگان کے پیسے کے تحفظ کے لیے عملی اقدامات کب نظر آئیں گے؟