لاہور ہائیکورٹ ملتان بینچ میں 26روز کے دوران 1289مقدمات نمٹا دیئے گئے

لاہور (این این آئی) لاہور ہائیکورٹ کے جسٹس غلام سرور نہنگ نے ملتان بینچ میں 7ستمبر سے 2اکتوبر 2026ء تک 26 روز کے دوران مجموعی طور پر 1289 مقدمات اور درخواستیں نمٹا دیں۔ عدالتی کارکردگی کے اعداد و شمار کے مطابق جسٹس غلام سرور نہنگ نے سنگل بینچ کی حیثیت سے 911مقدمات کے فیصلے کیے جبکہ جسٹس محمد طارق ندیم اور جسٹس غلام سرور نہنگ پر مشتمل ڈویژن بینچ نے 378مقدمات نمٹائے۔ ڈویژن بینچ کی جانب سے نمٹائے گئے 378 مقدمات میں 132 تازہ، 144ریگولر اور 102فوری نوعیت کے مقدمات شامل تھے، ڈویژن بینچ کے سامنے فوجداری اپیلوں، بریت کے خلاف اپیلوں، سزا کے خلاف اپیلوں، قتل کے ریفرنسز، ضمانتوں، نظرثانی درخواستوں اور مختلف نوعیت کی رٹ درخواستوں سمیت متعدد مقدمات زیر سماعت رہے۔