اسلام آباد( نامہ نگار خصوصی)وزیراعظم پاکستان نے پاکستانی عازمینِ حج کی سہولت اور حج کی پیشگی مالی منصوبہ بندی کے لیے وزارتِ مذہبی امور و بین المذاہب ہم آہنگی، وزارتِ خزانہ اور قومی بچت کی جانب سے پیش کردہ مشترکہ سمری کی منظوری دے دی ہے۔وزیراعظم کی منظوری کے بعد تینوں حکومتی اداروں کے اشتراک سے پاکستانی عازمینِ حج کے لیے شرعی اصولوں کے عین مطابق ، سود سے پاک حج سیونگ پلان متعارف کرانے کی راہ ہموار ہوگئی ہے۔ تفصیلات کے مطابق وزارتِ مذہبی امور میں آج جمعہ کے روز وفاقی سیکرٹری ابرار احمد مرزا کی زیر صدارت ایک اہم اجلاس منعقد ہوا جس میں وزارتِ خزانہ، مرکزی قومی بچت اور حج ونگ کے نمائندہ افسران شریک ہوئے ۔ اجلاس میں بتایا گیا کہ حج سیونگ پلان کے تحت عازمینِ حج مقدس سفر کی تیاری کے لیے پیشگی اور باقاعدہ بچت کی سہولت فراہم کی جائے گی۔ مجوزہ نظام کے ذریعے عازمینِ حج ڈیجیٹل ذرائع سے ماہانہ بنیاد پر رقم جمع کرا سکیں گے جبکہ اپنی مرضی کے مطابق بچت کی مدت کے انتخاب، فنڈز کی فیملی ٹرانسفر ، کسی بھی وقت بلا کٹوتی رقم کی واپسی سمیت دیگر سہولیات سے بھی استفادہ کر سکیں گے۔ سیکرٹری مذہبی امور نے کہا کہ حج سیونگ پلان کا بنیادی مقصد عازمینِ حج کو سفر حج کے اخراجات کے لیے بروقت اور منظم مالی منصوبہ بندی کا موقع فراہم کرنا ، بڑھتی مہنگائی کا مقابلہ اور مقدس سفر کی تیاری کو مزید آسان بنانا ہے۔سیکرٹری مذہبی امور نے مزید کہا کہ متعلقہ ادارے منظور شدہ سمری کے مطابق اس کے قواعد و ضوابط دو ماہ کے اندر تیار کر لیں ۔ قواعد میں حج سیونگ فنڈ کے ساتھ عمرہ سیونگ سکیم اور مذہبی زیارات سیونگ سکیم کی گنجائش بھی رکھی جائے ۔ ابتدائی طور پر وزارتِ مذہبی امور، وزارتِ خزانہ اور مرکزی قومی بچت کے باہمی اشتراک سے تیار کیا جانے والا یہ ڈیجیٹل نظام حج کی مالی منصوبہ بندی کو جدید تقاضوں سے ہم آہنگ کرنے کی جانب ایک اہم قدم ہوگا جو حکومتی ویژن کے مطابق حج انتظامات کو ڈیجیٹائز کرنے کی ایک کڑی ہے۔حج سیونگ پلان کے طریقہ کار، اہلیت، مدت، ڈیجیٹل سہولیات اور دیگر متعلقہ تفصیلات مناسب وقت پر عوام کے لیے جاری کی جائیں گی۔
