کراچی(این این آئی)ایف آئی اے امیگریشن نے جناح انٹرنیشنل ایئرپورٹ پر بروقت کارروائی کرتے ہوئے متحدہ عرب امارات جانے والی دو بہنوں اور ان کی والدہ کو کم عمر لڑکی کے مبینہ جنسی استحصال اور انسانی سمگلنگ کے خدشات کے پیش نظر آف لوڈ کردیا۔ ایف آئی اے کے مطابق تینوں خواتین کو مزید تفتیش اور قانونی کارروائی کے لیے انسدادِ انسانی سمگلنگ کے متعلقہ حکام کے حوالے کرنے کی کارروائی شروع کردی گئی ہے۔ترجمان ایف آئی اے کے مطابق امیگریشن کلیئرنس کے دوران مسافروں مائرہ، علیشہ اور ان کی والدہ بینہ سے سفری مقصد اور انتظامات کے بارے میں پوچھ گچھ کی گئی۔ مائرہ نے اپنی عمر تقریباً 16 سے 17 سال بتاتے ہوئے الزام عائد کیا کہ اس کے والدین نے پاسپورٹ اور شناختی دستاویزات میں اس کی عمر زیادہ ظاہر کی۔
