81 ٹن گدھے کا گوشت، ہڈیاں اور کھالیں چین کو برآمد

لاہور( این این آئی)گوادر نارتھ فری زون میں کام کرنے والی چینی کمپنی ہینگینگ نے 81ٹن گدھے کا گوشت، ہڈیاں اور کھالیں چین برآمد کر دیں،تین کھیپوں پر مشتمل یہ برآمدات 5 اکتوبر کو روانہ کی گئیں جن میں سے ہر کھیپ کا وزن 27ٹن تھا۔ کمپنی کے مطابق تمام کھیپیں مقررہ معیار، کسٹم کلیئرنس، برآمدی ضوابط اور دیگر لازمی کارروائیاں مکمل کرنے
کے بعد چین بھیجی گئیں۔رپورٹ کے مطابق ہینگینگ کے ایک عہدیدار نے بتایا کہ گدھے کا تمام گوشت منجمد حالت میں بحری جہازوں کے ذریعے چین روانہ کیا گیا۔ گوادر فری زون میں قائم کمپنی کے کارخانے میں سخت ضابطہ جاتی نگرانی کا نظام نافذ ہے جس کے تحت تیار کردہ مصنوعات اور ضمنی اجزا ء کی ترسیل صرف ہوائی یا بحری راستوں سے کی جا سکتی ہے تاکہ ان میں سے کوئی بھی چیز پاکستان کی مقامی منڈی میں داخل نہ ہو۔رپورٹ کے مطابق گدھوں کے گوشت اور کھالوں کی پروسیسنگ کے لیے پاکستان کا پہلا جدید مذبح خانہ گزشتہ سال تقریباً 5 کروڑ ڈالر کی لاگت سے مکمل کیا گیا تھا۔