عالمی منڈی میں ڈیزل کی قلت 2027ء تک برقرار رہنے کا خدشہ

پیرس (این این آئی) بین الاقوامی توانائی ایجنسی (آئی ای اے) نے خبردار کیا ہے کہ مشرق
وسطیٰ میں توانائی تنصیبات پر حملوں اور رسد میں مسلسل رکاوٹوں کے باعث عالمی منڈی میں ڈیزل کی قلت اور قیمتوں کا دبا ئو2027 تک برقرار رہ سکتا ہے۔ چینی خبر رساں ادارے کے مطابق ایجنسی نے اپنی اکتوبر کی آئل مارکیٹ رپورٹ میں بتایا کہ ستمبر میں عالمی ڈیزل برآمدات گزشتہ سال کے مقابلے میں یومیہ 7 لاکھ بیرل کم ہوگئیں، جس کے باعث ذخائر میں بھی کمی ہوئی۔ رپورٹ کے مطابق ستمبر میں ڈیزل کی قیمتیں 200 ڈالر فی بیرل سے تجاوز کرنے کے بعد کچھ کم ہوئی ہیں، تاہم بینچ مارک قیمتیں خام تیل کے مقابلے میں تقریباً دوگنا سطح پر برقرار ہیں۔ بلند قیمتوں سے اشیاء کی لاگت، مہنگائی، معاشی سرگرمیوں اور عوام کی قوتِ خرید متاثر ہو رہی ہے۔ عالمی توانائی ایجنسی نے کہا کہ مشرق وسطی سے ڈیزل کی رسد بحال نہ ہوئی تو منڈی میں توازن قائم رکھنے کے لیے طلب میں مزید کمی کرنا پڑسکتی ہے، جس کی معاشی قیمت بہت زیادہ ہوسکتی ہے۔ رپورٹ کے مطابق عالمی تیل کی طلب 2026 ء میں اوسطاً یومیہ 26 لاکھ بیرل کم ہونے کی پیشگوئی ہے، جبکہ 2027 میں اس میں یومیہ 20 لاکھ بیرل اضافے کا امکان ہے۔دوسری جانب عالمی تیل کی رسد 2026 ء میں یومیہ 58 لاکھ بیرل کم ہو کر 10 کروڑ 70 ہزار بیرل رہنے اور 2027 میں یومیہ 77 لاکھ بیرل بڑھنے کی توقع ہے۔ ایجنسی نے خبردار کیا کہ خلیجی خطے میں توانائی تنصیبات اور تیل بردار جہازوں پر بڑھتے ہوئے حملے رسد کی بحالی کو متاثر کرسکتے ہیں۔ مشرق وسطیٰ کے تنازعات حل نہ ہونے کی صورت میں آنے والے مہینوں میں عالمی تیل منڈی میں مزید اُتار چڑھائو کا خدشہ ہے۔