فتح جنگ،(بیورو رپورٹ)گورنر پنجاب سردار سلیم حیدر خان فتح جنگ کے نواحی گاؤں تاجہ بارہ پہنچ گئے، جہاں انہوں نے شمالی وزیرستان میں وطن عزیز کے دفاع کے دوران جامِ شہادت نوش کرنے والے پاک فوج کے جوان نیاز علی خان شہید کے اہل خانہ سے ملاقات کی، ان سے دلی تعزیت اور ہمدردی کا اظہار کیا اور شہید کے درجات کی بلندی، مغفرت اور لواحقین کے لیے صبرِ جمیل کی دعا کی۔اس موقع پر ہی ایس او ٹو گورنر سردار محمد علی خان۔سابق چیئرمین سردار احسن ملال۔سردار سجاد خان۔سردار لیاقت علی خان۔سردار نیاز علی خان سردار تیمور خان طارق محمود قادری۔سردار اختر حیات۔چیف محمد اسلم بھی موجود تھے گورنر پنجاب سردار سلیم حیدر خان نے شہید نیاز علی خان کی عظیم قربانی کو زبردست الفاظ میں خراجِ تحسین پیش کرتے ہوئے کہا کہ پوری قوم کو پاک فوج کے بہادر شہداء پر فخر ہے۔ شہداء نے وطن عزیز کے دفاع، سلامتی اور استحکام کے لیے اپنی قیمتی جانوں کا نذرانہ پیش کیا، ان کی لازوال قربانیوں کی بدولت پاکستان کا دفاع مضبوط اور ملک قائم و دائم ہے۔ قوم اپنے ان بہادر سپوتوں کی قربانیوں کو کبھی فراموش نہیں کرے گی۔گورنر پنجاب نے کہا کہ شہادت ہمارے لیے اعزاز اور ورثہ ہے۔ وطن عزیز کی حفاظت کے لیے اپنی جانیں قربان کرنے والے جوان قوم کے ماتھے کا جھومر ہیں اور ان کی قربانیاں ہمیشہ تاریخ میں سنہری حروف سے لکھی جائیں گی۔ پاک فوج کے جوان اپنی پیشہ ورانہ ذمہ داریاں نبھاتے ہوئے ملک و قوم کے تحفظ کے لیے ہر قسم کی قربانی دینے کا عزم رکھتے ہیں، جبکہ پوری قوم ان کے شانہ بشانہ کھڑی ہے۔
سردار سلیم حیدر خان نے کہا کہ گاؤں تاجہ بارہ کو یہ منفرد اعزاز حاصل ہے کہ اس دھرتی کے تین بہادر سپوتوں نے وطن عزیز کی خاطر اپنی جانوں کا نذرانہ پیش کرکے شہادت کا عظیم مرتبہ حاصل کیا۔ یہ قربانیاں اس بات کا ثبوت ہیں کہ اس علاقے کے عوام کے دل وطن کی محبت اور قومی جذبے سے سرشار ہیں۔ شہداء نے اپنے لہو سے وطن کی مٹی کو سربلند کیا اور آنے والی نسلوں کے لیے ایثار، بہادری اور حب الوطنی کی روشن مثال قائم کی۔گورنر پنجاب نے شہید نیاز علی خان کے اہل خانہ سے اظہارِ یکجہتی کرتے ہوئے کہا کہ شہداء کے خاندان پوری قوم کا فخر ہیں۔ ان خاندانوں نے اپنے پیاروں کی جدائی کا عظیم صدمہ برداشت کرکے ملک و قوم کے لیے ناقابلِ فراموش قربانی دی ہے۔ پوری قوم شہداء کے لواحقین کے غم میں برابر کی شریک ہے اور ان کی عظیم قربانیوں کو قدر و احترام کی نگاہ سے دیکھتی ہے۔انہوں نے دعا کی کہ اللہ تعالیٰ شہید نیاز علی خان سمیت تمام شہداء کے درجات بلند فرمائے، انہیں جوارِ رحمت میں اعلیٰ مقام عطا کرے اور ان کے اہل خانہ کو یہ عظیم صدمہ برداشت کرنے کی ہمت اور حوصلہ دے۔ انہوں نے اس عزم کا اظہار کیا کہ پاکستان کی سلامتی، خودمختاری اور دفاع کے لیے جانوں کا نذرانہ پیش کرنے والے شہداء کی قربانیاں ہمیشہ قوم کے لیے مشعلِ راہ رہیں گی
