چکوال(بیورو رپورٹ)کرائم کنٹرول ڈیپارٹمنٹ (سی سی ڈی) چکوال نے اہم کارروائی کرتے ہوئے مختلف اضلاع میں مسلح ڈکیتی کی 15 سے زائد وارداتوں میں مبینہ طور پر ملوث چار رکنی بین الاضلاعی ڈکیت گینگ کو گرفتار کر لیا۔ سی سی ڈی ذرائع کے مطابق گرفتار ملزمان پر چکوال، اسلام آباد، راولپنڈی اور گوجر خان کے مختلف علاقوں میں شاپنگ مالز، کریانہ اسٹورز اور یوٹیلٹی اسٹورز پر اسلحے کے زور پر ڈکیتیاں کرنے کا الزام ہے۔ مسلسل وارداتوں کے باعث یہ گینگ قانون نافذ کرنے والے اداروں کے لیے ایک چیلنج بن چکا تھا جبکہ شہریوں میں بھی خوف و ہراس پایا جاتا تھا۔ ذرائع کے مطابق مذکورہ گینگ نے گزشتہ تین ماہ کے دوران چکوال شہر میں بھی کریانہ اسٹورز اور شاپنگ مالز کو نشانہ بناتے ہوئے دن دہاڑے مسلح ڈکیتی کی چار وارداتیں کی تھیں۔گرفتار ملزمان کی شناخت درج ذیل ناموں سے ہوئی ہے: محمد ندیم ولد محمد لطیف، ساکن ڈھوک فضل آباد داخلی لنگاہ ضلع چکوال، محسن علی ولد مبارک علی، ساکن محلہ بڑکی جدید تحصیل گوجر خان ضلع راولپنڈی، شاہد سعید ولد سعید احمد ساکن راماں تحصیل گوجر خان ضلع راولپنڈی، زین عباس ولد نیاز حسین ساکن کھوڑ، تحصیل پنڈی گھیب ضلع اٹک،سی سی ڈی ذرائع نے چاروں ملزمان کی گرفتاری کی تصدیق کر دی ہے۔
