ملک کے مختلف شہروں میں گندم’ آٹے اور روٹی کی قیمت میں اضافہ

لاہور (سٹی رپورٹر) پنجاب سمیت ملک کے مختلف شہروں میں گندم، آٹے اور روٹی کی قیمتوں میں اضافہ ہو گیا۔ ذرائع کے مطابق لاہور، اسلام آباد، راولپنڈی، گوجرانوالہ اور ملتان سمیت مختلف شہروں میں20 کلو آٹے کے تھیلے کی عدم دستیابی جبکہ 10 کلو تھیلے کی محدود فراہمی کی شکایات ہیں،15 کلو آٹے کا تھیلا 2230 روپے میں فروخت کیا جارہا ہے۔ ذرائع کا کہنا ہے کہ لاہور میں گندم کی فی من قیمت میں 1400 روپے اضافے کے بعد نرخ 5250 روپے تک پہنچ گئے ہیں جبکہ راولپنڈی اور اسلام آباد میں گندم 5400 روپے فی من تک فروخت ہو رہی ہے، جنوبی پنجاب میں گندم کی فی من قیمت5200 روپے بتائی جارہی ہے۔ پنجاب میں سرکاری گندم کی قیمت3800 روپے فی من مقرر ہونے کے باوجود اوپن مارکیٹ میں بڑھتے نرخوں کے باعث آٹے کی قیمتوں پر دبائو برقرار ہے۔ ذرائع کے مطابق صوبے بھر میں نجی آٹا 150 روپے فی کلو جبکہ لاہور میں چکی کا آٹا 200 روپے فی کلو تک فروخت کیا جارہا ہے۔ دوسری جانب روٹی کی قیمتوں میں اضافے کی شکایات بھی سامنے آرہی ہیں۔ ذرائع کے مطابق مقررہ قیمت 14 روپے کے بجائے سادہ روٹی 20 سے 25 روپے میں فروخت کی جا رہی ہے جس سے شہریوں کیلئے روزمرہ اخراجات میں مزید اضافہ ہو گیا ہے۔ ادھر ڈی جی فوڈ پنجاب امجد حفیظ نے دعوی کیا ہے کہ صوبے میں آٹے کی سپلائی میں کسی قسم کی رکاوٹ پیدا نہیں ہونے دی جائے گی، ذخیرہ اندوزی اور ناجائز منافع خوری کے خلاف متعلقہ ادارے متحرک ہیں اور قانون کے مطابق کارروائیاں جاری ہیں۔