جڑانوالہ میں ایم سی کی 150 دکانوں کی نیلامی روکنے کے حکم میں توسیع

لاہور (کورٹ رپورٹر) لاہور ہائیکورٹ نے جڑانوالہ میں میونسپل کمیٹی کی 150 دکانوں کی نیلامی
روکنے کے حکم میں توسیع کرتے ہوئے سرکاری وکیل سے آئندہ سماعت پر تفصیلی جواب طلب کرلیا۔ جسٹس احمد ندیم ارشد نے شیخ غفار سمیت دیگر درخواست گزاروں کی درخواستوں پر سماعت کی۔ عدالت نے سرکاری وکیل کی جانب سے جمع کرایا گیا نامکمل جواب مسترد کرتے ہوئے ہدایت کی کہ ہر درخواست میں الگ الگ جواب داخل کیا جائے۔ درخواست گزاروں کے وکیل شعیب سلیم نے موقف اختیار کیا کہ درخواست گزار گزشتہ 40 سال سے میونسپل کمیٹی کی دکانوں میں کاروبار کر رہے ہیں، تاہم میونسپل کمیٹی نے کرایہ نامے کی خلاف ورزی کرتے ہوئے دکانوں کی نیلامی کا اشتہار جاری کر دیا۔ درخواست گزاروں کے مطابق انہوں نے 2005ء میں سکیورٹی کی مد میں پانچ، پانچ لاکھ روپے جمع کرائے تھے جبکہ متعدد دکانیں انہوں نے اپنی مدد آپ کے تحت تعمیر کیں۔ وکیل نے موقف اختیار کیا کہ اشتہار میں مقرر کردہ کرایہ موجودہ کرائے سے بھی کم ہے، جبکہ درخواست گزار مجوزہ کرائے سے دو ہزار روپے زیادہ کرایہ ادا کر رہے ہیں۔ درخواست گزاروں نے عدالت سے استدعا کی کہ دکانوں کی نیلامی اور اس حوالے سے جاری اشتہار کو کالعدم قرار دیا جائے۔