لاہور(سپورٹس رپورٹر)صوبائی وزیر کھیل ملک فیصل ایوب کھوکھر کی زیر صدارت سی ایم پنجاب یوتھ گیمز 2026 میں رجسٹریشن کے عمل کو تیز کرنے اور نوجوانوں کی زیادہ سے زیادہ شرکت یقینی بنانے کے حوالے سے اہم اجلاس منعقد ہوا۔اجلاس میں سپورٹس کوآرڈینٹر ملک انوش کھوکھر، لاہور کی مختلف یونین کونسلز کے کوآرڈینیٹرز، تحصیل رائیونڈ کے سپورٹس افسران اور متعلقہ حکام نے شرکت کی۔ اجلاس میں یوتھ گیمز کی رجسٹریشن کے عمل کا جائزہ لیا گیا اور زیادہ سے زیادہ بچوں کو کھیلوں کی سرگرمیوں میں شامل کرنے کے لیے ضروری اقدامات پر تبادلہ خیال کیا گیا۔ صوبائی وزیر کھیل ملک فیصل ایوب کھوکھر نے اجلاس سے خطاب کرتے ہوئے کہا ہے کہ یوتھ گیمز کے لیے رجسٹریشن کی تعداد 24 لاکھ تک پہنچ چکی ہے، تاہم ہمارا اصل ہدف ایک کروڑ بچوں کی رجسٹریشن ہے، جبکہ 50 لاکھ بچوں کو عملی طور پر کھیلوں کے میدانوں میں سرگرم دیکھنا چاہتے ہیں۔ انہوں نے کہا کہ اس ہدف کے حصول کے لیے تمام متعلقہ محکموں، کوارڈینیٹرز اور سپورٹس افسران کو مربوط انداز میں کام کرنا ہوگا تاکہ پنجاب کے ہر علاقے سے نوجوانوں کی بھرپور شرکت یقینی بنائی جا سکے۔ صوبائی وزیر کھیل ملک فیصل ایوب کھوکھر نے کہا کہ وزیراعلیٰ پنجاب مریم نواز شریف کی ہدایت کے مطابق یوتھ گیمز کو نچلی سطح تک وسعت دی جا رہی ہے تاکہ گلیوں، محلوں اور مقامی آبادیوں میں کھیلنے والے بچوں کو بھی اپنی صلاحیتیں دکھانے کے مواقع میسر آئیں۔ انہوں نے کہا کہ یوتھ گیمز کا مقصد نوجوانوں کو کھیلوں کے میدانوں تک لانا، ان کی صلاحیتوں کو نکھارنا اور انہیں مثبت سرگرمیوں میں حصہ لینے کے مواقع فراہم کرنا ہے۔صوبائی وزیر نے ہدایت کی کہ مدارس اور مساجد میں زیرِ تعلیم بچوں کو بھی یوتھ گیمز میں بھرپور شرکت کے مواقع فراہم کیے جائیں۔ انہوں نے کہا کہ کھیلوں کی سرگرمیاں بچوں میں نظم و ضبط، ٹیم ورک، برداشت، خود اعتمادی اور مثبت مسابقت کے جذبے کو فروغ دیتی ہیں، اس لیے کھیلوں کے مواقع کو معاشرے کے تمام طبقات تک پہنچانا ضروری ہے۔انہوں نے بتایا کہ یوتھ گیمز میں نمایاں کارکردگی دکھانے والے کھلاڑیوں کی حوصلہ افزائی کے لیے کروڑوں روپے کے انعامات دیئے جائیں گے، جبکہ نوجوان کھلاڑیوں کی معاونت اور انہیں کھیلوں کے ساتھ منسلک رکھنے کے لیے بہت جلد یوتھاسپورٹس کارڈز بھی متعارف کرائے جا رہے ہیں۔
ہم 50 لاکھ بچوں کو عملی طور پر کھیل کے میدان میں سرگرم دیکھنا چاہتے ہیں:خطاب
