اسلام آباد ، گوادر، کراچی ( نیوز ایجنسیاں) فیلڈ مارشل سید عاصم منیر نے کہا ہے کہ دہشت گردوں کو چن
چن کر نشانہ بنائیں گے۔ عوام کی حمایت سے دہشت گردوں اور ان کے گمراہ کن نظریے کو مکمل شکست دیں گے۔ ادھر سکیورٹی فورسز نے گوادر میں کلیئرنس آپریشن کے دوران 7 دہشت گردوں کو جہنم واصل کردیاجبکہ کراچی سے فتنہ الہندوستان اور فتنہ الخوارج کے 3 دہشت گردوں کو گرفتار کرلیا گیا۔ چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر نے کہا ہے کہ عوام کی حمایت سے دہشت گردوں اور انکے گمراہ کن نظریے کو مکمل شکست دیں گے، دہشت گرد جہاں کہیں بھی ہوں گے انہیں سختی سے نشانہ بنائیں گے۔آئی ایس پی آر کے مطابق آرمی چیف و چیف آف ڈیفنس فورسز فیلڈ مارشل سید عاصم منیر نے کور ہیڈ کوارٹرز، پشاور کا دورہ کیا، جہاں انہیں موجودہ سکیورٹی صورتحال، انسداد دہشت گردی کی جاری کارروائیوں، بارڈر مینجمنٹ کے اقدامات اور صوبے میں تعینات فارمیشنز کی آپریشنل تیاریوں پر بریفنگ دی گئی۔آئی ایس پی آر کے مطابق فیلڈ مارشل نے افسران اور دستوں کے اعلیٰ حوصلے اور پیشہ ورانہ مہارت کو سراہتے ہوئے انہیں خطرات کا موثر طریقے سے مقابلہ کرنے کے لیے چوکس رہنے اور آپریشنل تیاری کے اعلیٰ معیار کو برقرار رکھنے کی ہدایت کی۔انہوں نے اس بات پر زور دیاکہ ہم اسپانسرڈ دہشت گرد تنظیموں کے خلاف مہم کو بھرپور طریقے سے جاری رکھیں گے اور وہ جہاں کہیں بھی ہوں گے انہیں بھرپور انداز میں نشانہ بنائیں گے۔سیکیورٹی فورسز کے شہدا اور غازیوں سمیت پاکستانی عوام کی قربانیوں کو خراج تحسین پیش کرتے ہوئے فیلڈ مارشل سید عاصم منیر نے اس بات کا اعادہ کیاکہ عوام کی حمایت سے پاکستان دہشت گردوں اور ان کے بگڑے ہوئے نظریات کو ضرور شکست دے گا۔قبل ازیں پشاور آمد پر کور کمانڈر پشاور نے آرمی چیف کا استقبال کیا۔ادھر گوادر میں سکیورٹی فورسز کے کلیئرنس آپریشن کے دوران 7دہشت گرد ہلاک ہوگئے، جبکہ علاقے کو بارودی مواد اور دیسی ساختہ دھماکا خیز آلات(آئی ای ڈیز) سے پاک کرنے کے لیے کارروائی جاری ہے۔سکیورٹی ذرائع کے مطابق گوادر میں سکیورٹی فورسز کا کلیئرنس آپریشن تاحال جاری ہے۔ فورسز اردگرد کے علاقوں کی تلاشی لے رہی ہیں تاکہ ممکنہ طور پر نصب بارودی مواد اور آئی ای ڈیز کا سراغ لگا کر علاقے کو محفوظ بنایا جاسکے۔ذرائع کا کہنا ہے کہ کلیئرنس آپریشن مکمل ہونے تک علاقے کو محفوظ بنانے کی کارروائیاں جاری رہیں گی۔دریں اثناء سی ٹی ڈی اوراوروفاقی حساس ادارے نے بھارتی حمایت یافتہ کالعدم تنظیم بلوچستان لبریشن آرمی اورفتنہ الخوارج کالعدم تحریک طالبان پاکستان کے دہشت گردوں کے خلاف گلستان جوہر اور گلبائی چوک کے قریب مشترکہ کارروائی کرتے ہوئے 3دہشت گردوں کوگرفتارکرکے ان کے قبضے سے تیارشدہ آئی ای ڈی، ہینڈ گرنیڈ اوراسلحہ برآمد کرلیا۔ گرفتاردہشت گردوں کی شناخت رحیم فضل ولد فضل محمود اوربالاچ بلوچ ولد رسول بخش ، شاہ نور رحمان خان ولد اختر عالم کے ناموں سے کی گئی۔ترجمان کے مطابق سی ٹی ڈی اور وفاقی حساس ادارے کو اطلاع موصول ہوئی تھی کہ کالعدم تنظیم سے تعلق رکھنے والے تربیت یافتہ دہشت گرد اپنے تنظیمی کمانڈر کی ہدایت پرشہر میں موجود ہیں ۔ابتدائی اطلاعات کے مطابق دہشت گرد بلوچستان میں ٹارگٹ کلنگ،اغوا اورسکیورٹی فورسز پرحملوں میں ملوث رہے ہیں،دہشت گردوں نے افغانستان میں اسلحہ چلانے کی تربیت حاصل کی تھی ۔
فیلڈ مارشل
