این ایچ اے کے مالیاتی استحکام کا حصول اولین ترجیح ہے:احد چیمہ

اسلام آباد (این این آئی)وفاقی وزیر برائے اقتصادی امور و اسٹیبلشمنٹ ڈویژن سینیٹر احد چیمہ نے کہا ہے کہ این ایچ اے کے مالیاتی استحکام کا حصول اولین ترجیح ہے۔وفاقی وزیر برائے اقتصادی امور و اسٹیبلشمنٹ ڈویژن سینیٹر احد چیمہ کی زیرِ صدارت نیشنل ہائی وے اتھارٹی کے حوالے سیاجلاس منعقد ہوا جس میں این ایچ اے کا بزنس پلان تیار کرنے کیلئے اقدامات، ایشیائی ترقیاتی بینک (اے ڈی بی)کے کنسلٹنٹ کے ہمراہ جاری جائزے اور ادارے کو مالی طور پر مستحکم بنانے کی حکمت عملی پر غور کیا گیا۔حکام نے اے ڈی بی کے کنسلٹنٹ کے ساتھ جاری سٹڈی کے ابتدائی نتائج پر اجلاس کو بریفنگ دی۔ اس موقع پر این ایچ اے کی کارکردگی بہتر بنانے، اس کے آپریشنز کو فعال کرنے اور مالیاتی پائیداری کے فروغ کے لیے مختلف ماڈلز اور تجاویز پیش کی گئیں۔وزارت اقتصادی امور کی جانب سے جاری اعلامیہ کے مطابق وفاقی وزیر احد چیمہ نے این ایچ اے کی صلاحیتوں کے جائزے اور واضح ٹائم لائن کے ساتھ ایک قابلِ عمل بزنس پلان تیار کرنے پر زور دیا۔