شیخ عبدالقادر کے خاندان کے شعری مجموعہ کی تقریبِ رونمائی

اسلام آباد (سٹاف رپورٹر)تحریکِ پاکستان کے ممتاز کارکن، ادیب اور ادبی جریدے ‘مخزن’ کے مدیر شیخ عبدالقادر کا علمی و ادبی ورثہ زندہ ہے اور ان کے خاندان کے افراد اسے اگلی نسلوں تک منتقل کر رہے ہیں۔ اسی سلسلے کی ایک اہم اور بصیرت افروز کڑی انگریزی شعری مجموعہ "As One Lamp Lights Another” ہے، جسے اسلام آباد کلب میں پروین شاکر ٹرسٹ کی جانب سے متعارف کرایا گیا۔عبدالقادر، اقبال کی کتاب ‘بانگِ درا’ کے دیباچے کے مصنف تھے۔ لیڈی عبدالقادر خواتین کی تعلیم کو فروغ دینے اور انہیں پنجاب کے سماجی و معاشی دھارے میں شامل کرنے کے سلسلے میں ایک نمایاں شخصیت تھیں۔ اس کتاب کی تقریبِ رونمائی کی میزبانی پروین قادر آغا نے بہت عمدگی سے کی، جبکہ اسٹیج پر سر عبدالقادر کے خاندان کے سات افراد موجود تھے جنہوں نے بشارت قادر کی جانب سے مرتب اور مدون کی گئی اس کتاب کی تیاری میں اپنی شاعری کے ذریعے حصہ ڈالا۔ یہ کتاب ایمل پبلی کیشنز کے شاہد اعوان نے شائع کی ہے۔ بنیادی طور پر یہ انگریزی زبان میں لکھی گئی پاکستانی نظموں کا مجموعہ ہے۔ان کے پانچ بیٹے تھے لیکن کوئی بیٹی نہیں تھی۔ ان کے بیٹے اور پوتے پوتیاں اس کتاب میں حصہ لینے والے سات افراد تقریبِ رونمائی میں موجود تھے ۔ ان میں بشارت قادر، اصغر قادر، خرم قادر، رابعہ قادر ضیا، غزال قادر، میکائل علی قادر اور جنید قادرشامل تھے۔ پروین قادر آغا نے اپنے استقبالیہ خطاب میں معاشرے میں اردو اور تعلیم کے فروغ کے لیے سر عبدالقادر اور لیڈی عبدالقادر کی خدمات پر روشنی ڈالی۔ انہوں نے خاندان کی جانب سے ان کی یادوں اور ورثے کو زندہ رکھنے کے لیے کی جانے والی کاوشوں کو سراہا۔ انہوں نے بتایا کہ یہ ٹرسٹ کسی کتاب کی رونمائی کی 25 ویں تقریب کا انعقاد کر رہا ہے۔ اس موقع پر پی این سی اے کے سابق ڈائریکٹر جنرل، معروف فنکار اور شاعر راجہ چنگیز سلطان مہمانِ خصوصی تھے۔ انہوں نے قادر خاندان کو شاندار خراجِ تحسین پیش کیا اور کہا کہ اس خاندان کی موجودگی اور اس تقریب کی صدارت کرنا ان کے لیے اعزاز کی بات ہے۔ تقریبِ رونمائی سے خطاب کرنے والوں میں بشارت قادر، اصغر قادر، ڈاکٹر صوفیہ حسین، رخسیہ وقاص، رعنا سیرت اور شبیر احمد بھی شامل تھے جنہوں نے اس خاندان کی خدمات کے مختلف پہلوں yپر اپنے خیالات کا اظہار کیا۔