بدنام زمانہ منشیات فروش کیخلاف بھائی پھیرو پولیس کا بڑا آپریشن کئی گھنٹے تک فائرنگ کا تبادلہ

بھائی پھیرو’ جمبر (نمائندگان خبریں) ڈی پی او قصور آفتاب پھلرواں کی ہدایت پر اسلحہ کے زور پر منشیات فروشی کرنے والے بدنام زمانہ منشیات فروش کے خلاف تھانہ صدر بھائی پھیرو پولیس کا بڑا آپریشن، کئی گھنٹے فائرنگ کے تبادلہ میں علاقہ میدان جنگ بن گیا۔ پولیس اہلکار کی آہنی ہیلمٹ گولیوں سے چھلنی، سب انسپکٹر طارق اور ٹیم نے مبینہ ریکارڈ یافتہ منشیات فروش رانا وحید احمد کو گرفتار کر لیا، لاکھوںروپے کی تین کلو چرس اور خود کار ناجائز اسلحہ کی بھاری مقدار برآمد۔ تفصیلات کے مطابق گزشتہ روز نواحی گائوں گگہ سرائے میں تھانہ صدر بھائی پھیرو پولیس کے سب انسپکٹر طارق محمود اور ان کی پولیس ٹیم اور مبینہ بااثر منشیات فروش کے درمیان کئی گھنٹے تک فائرنگ کا تبادلہ جاری رہا جس کے باعث علاقہ میدانِ جنگ کا منظر پیش کرنے لگا۔ فائرنگ کے دوران پولیس کے ایک جوان اے ایس آئی محمد رشید کی آہنی ہیلمٹ بھی گولیوں سے چھلنی ہو گئی تاہم سب انسپکٹر طارق اور ان کے ساتھیوں نے خطرات کا سامنا کرتے ہوئے مبینہ ریکارڈ یافتہ بدنام زمانہ منشیات فروش راناوحید کو گرفتار کر لیا۔ پولیس کارروائی کے دوران گرفتار ملزم کے قبضے سے مبینہ طور پر لاکھوں روپے مالیت کی تین کلو چرس اور ناجائز اسلحے کی بھاری مقدار جس میں 9mm خود کاد پسٹل اور 30 بور پسٹل ،گولہ بارود کی بھاری مقدار چلے ہوئے کارتوسوں کی بڑی مقدار برآمد کرنے کا دعویٰ کیا گیا ہے۔ کئی گھنٹے جاری رہنے والے فائرنگ کے تبادلے نے علاقے میں خوف و ہراس کی فضا پیدا کر دی۔ عوامی و سماجی حلقوں نے تھانہ صدر بھائی پھیرو پولیس کی کارروائی کو سراہتے ہوئے کہا کہ منشیات کا کاروبار نوجوان نسل اور معاشرے کے مستقبل کے لیے سنگین خطرہ ہے۔ ان حلقوں کے مطابق منشیات فروشوں کے خلاف مؤثر کارروائی اور قانون کی عملداری وقت کی اہم ضرورت ہے۔ عوامی و سماجی حلقوں نے ڈی پی او قصور آفتاب احمد پھلروان سے مطالبہ کیا ہے کہ خطرناک صورتِحال میں کارروائی کرنے والے سب انسپکٹر طارق اور ان کی ٹیم کی خدمات کے اعتراف میں انہیں نقد انعامات اور تعریفی اسناد سے نوازا جائے تاکہ پولیس اہلکاروں کی حوصلہ افزائی ہو اور جرائم پیشہ عناصر کے خلاف کارروائیوں کا سلسلہ مزید مؤثر بنایا جاسکے۔ یہ امر قابل ذکر ہے کہ مذکورہ منشیات فروش بڑی دیدہ دلیری سے اسلحہ کی نوک پر منشیات فروشی کرتا تھا اور اگر کبھی پولیس یا کوئی بھی سرکاری ادارہ اسے پکڑنے آتا تو وہ اندھادھند فائرنگ کرکے بھاگ جانے کا میاب ہو جاتا۔ موجودہ صدر پولیس نے اپنی جانوں پر کھیل کر منشیات فروش کو گرفتار کرکے قانون کی رٹ قائم کر دی۔