لاہور کا آلودہ ترین شہروں میں تیسرا نمبر’ایئر کوالٹی انڈیکس 207 ریکارڈ

لاہور (سٹی رپورٹر) لاہور کا آلودہ ترین شہروں میں تیسرا نمبر، ایئر کوالٹی انڈیکس207 ریکارڈ شہر میں سورج کی تپش میں کمی آنے لگی ہے جبکہ درجہ حرارت میں بھی کمی ریکارڈ کی جارہی ہے۔ محکمہ موسمیات کے مطابق لاہور میں کم سے کم درجہ حرارت16 ڈگری سینٹی گریڈ جبکہ زیادہ سے زیادہ 29 ڈگری سینٹی گریڈ تک رہنے کا امکان ہے۔ محکمہ موسمیات کے اعدادوشمار کے مطابق ہوا کی رفتار 3 کلو میٹر فی گھنٹہ جبکہ ہوا میں نمی کا تناسب57 فیصد ریکارڈ کیا گیا ہے’ شہر میں آج بارش کا کوئی امکان نہیں ہے۔ دوسری جانب لاہور میں فضائی آلودگی کی صورتحال تشویشناک ہو گئی ہے اور شہر آلودہ ترین شہروں میں تیسرے نمبر پر آگیا ہے، شہر میں سموگ اور فضائی آلودگی کی اوسط شرح207 ریکارڈ کی گئی ہے، فضائی آلودگی کے مقامی اعدادوشمار کے مطابق سید مراتب علی روڈ کے علاقے میں ایئر کوالٹی انڈیکس (AQI) 288 ریکارڈ کیا گیا جبکہ ماڈل ٹائون میں فضائی آلودگی کی شرح262 تک پہنچ گئی۔ موسم میں بہتری اور درجہ حرارت میں کمی کے باوجود شہر میں فضائی آلودگی شہریوں کیلئے ایک بڑا مسئلہ بنی ہوئی ہے، شہریوں کو ہدایت کی جاتی ہے کہ آلودگی کی بلند سطح کے دوران غیر ضروری طور پر کھلی فضا میں طویل وقت گزارنے سے گریز کریں، خصوصا بچے، بزرگ اور سانس کی بیماریوں میں مبتلا افراد احتیاط برتیں۔