پنجاب حکومت کاخصوصی تعلیم کو ڈیجیٹلائز کرنے کا فیصلہ

لاہور( این این آئی)پنجاب میں خصوصی تعلیم کے شعبے کو جدید ٹیکنالوجی سے ہم آہنگ کرنے اور خصوصی بچوں کیلئے تدریسی نظام آسان بنانے کا فیصلہ کیا گیا ہے۔ڈی جی سپیشل ایجوکیشن شعیب خان جدون نے پنجاب انفارمیشن ٹیکنالوجی بورڈ کے وفد سے ملاقات کی جس میں خصوصی تعلیم کو ڈیجیٹلائز کرنے اور جدید تعلیمی سہولیات کی فراہمی سے متعلق اقدامات پر تبادلہ خیال کیا گیا۔منصوبے کے تحت کلاس رومز کے لیے عالمی معیار کے جدید ڈیجیٹل لرننگ ماڈیولز تیار کیے جائیں گے، جبکہ خصوصی بچوں کی درسی کتب کو آسان ڈیجیٹل فارمیٹس میں تبدیل کیا جائے گا تاکہ انہیں سیکھنے کے بہتر مواقع فراہم کیے جا سکیں۔اساتذہ اور سکول اسٹاف کی صلاحیتوں میں اضافے کے لیے تربیتی پروگرامز بھی متعارف کرائے جائیں گے۔ اس کے علاوہ تعلیمی ویڈیوز کی تیاری کے لیے جدید ترین اِن ہاس اسٹوڈیو قائم کرنے کا منصوبہ بھی شامل ہے۔ڈی جی سپیشل ایجوکیشن شعیب خان جدون نے کہا کہ جدید ٹیکنالوجی کے استعمال سے خصوصی بچوں کو تعلیم کے یکساں مواقع فراہم کیے جائیں گے۔ خصوصی بچوں کو جدید تقاضوں سے ہم آہنگ کرنا ترجیح ہے اور اس مقصد کے لیے آسان اور موثرتدریسی نظام متعارف کرایا جا رہا ہے۔