گلیشیئرز سے متعلق تباہ کن واقعات کو اعداد و شمار کے طور پر دیکھنے کے بجائے انکے انسانی پہلوئوں کو سمجھنا ضروری : مصدق ملک

اسلام آباد (این این آئی)وفاقی وزیر برائے موسمیاتی تبدیلی و ماحولیاتی ہم آہنگی ڈاکٹر مصدق ملک نے کہا ہے کہ گلیشیئرز سے متعلق تباہ کن واقعات کو محض اعداد و شمار کے طور پر دیکھنے کے بجائے ان کے انسانی پہلوں کو سمجھنا ضروری ہے۔پیر کو یہاں پری کاپ۔31 ڈائیلاگ سے خطاب کرتے ہوئے وفاقی وزیر ڈاکٹر مصدق ملک نے کہا کہ عالمی درجہ حرارت میں اضافے کے باعث گلیشیئرز کے پگھلنے اور کلائوڈ برسٹ سے پاکستان سمیت دنیا کے مختلف ممالک کو سنگین خطرات لاحق ہیں جبکہ موسمیاتی تبدیلی سے متاثرہ ممالک کو ماحولیاتی مالی معاونت کی مناسب فراہمی بھی ایک بڑا چیلنج ہے۔انہوں نے کہا کہ گلیشیئرز سے متعلق تباہ کن واقعات کو محض اعداد و شمار کے طور پر دیکھنے کے بجائے ان کے انسانی پہلوئوں کو سمجھنا ضروری ہے کیونکہ ان آفات میں صرف مکانات اور بنیادی ڈھانچے ہی تباہ نہیں ہوتے بلکہ لوگوں کے بچپن، یادیں، معاش اور پوری آبادیائوں بھی متاثر ہوتی ہیں۔