لاڑکانہ میں یوم سیاہ کشمیر کے موقع پر ”کشمیر بنے گا پاکستان” ریلی

لاڑکانہ(بیورورپورٹ) لاڑکانہ میں یوم سیاہ کشمیر کے موقع پر ”کشمیر بنے گا پاکستان” ریلی، کشمیریوں سے اظہار یکجہتی تفصیلات کے مطابق مقبوضہ کشمیر میں بھارتی تسلط کے خلاف یومِ سیاہ اور کشمیری عوام سے اظہار یکجہتی کے لیے لاڑکانہ میں ”کشمیر بنے گا پاکستان” ریلی نکالی گئی، جس میں ضلعی انتظامیہ، محکمہ سوشل ویلفیئر، پولیس، محکمہ تعلیم، طلبہ اور سول سوسائٹی کے نمائندوں نے شرکت کی۔ریلی کا آغاز پائلٹ ہائی اسکول لاڑکانہ سے ہوا۔ اس موقع پر ڈپٹی کمشنر لاڑکانہ طارق منظور چانڈیو، چیئرمین ضلع کونسل اعجاز لغاری، ڈائریکٹر سوشل ویلفیئر اظہار علی عباسی، ڈپٹی ڈائریکٹر این سی ایچ ڈی سید امداد علی شاہ، میڈیکل سپرنٹنڈنٹ امجد علی بجارانی، ڈی ایس پی حیدری فراز میتلو، محکمہ تعلیم کے افسران انیس الرحمان جلبانی اور عبدالرشید چانڈیو سمیت اساتذہ اور دیگر افراد شریک ہوئے۔ریلی کے شرکاء نے ہاتھوں میں بینرز اٹھا رکھے تھے اور کشمیری عوام کے حق میں نعرے لگاتے ہوئے ان کے ساتھ یکجہتی کا اظہار کیا۔ اس موقع پر شرکاء کا کہنا تھا کہ کشمیری عوام طویل عرصے سے اپنے حقِ خودارادیت کے لیے جدوجہد کر رہے ہیں، پاکستان کشمیریوں کی سیاسی، سفارتی اور اخلاقی حمایت جاری رکھے گا اور عالمی برادری کو مسئلہ کشمیر کے حل کے لیے اپنا کردار ادا کرنا چاہیے۔شرکاء نے کہا کہ کشمیر پاکستان کی شہ رگ ہے اور پاکستانی عوام کشمیری بھائیوں اور بہنوں کے ساتھ کھڑے ہیں۔ ان کا کہنا تھا کہ کشمیری عوام کو ان کا حق خودارادیت ملنا چاہیے اور پاکستان ہر عالمی فورم پر مسئلہ کشمیر اجاگر کرتا رہے گا۔ریلی کے موقع پر پائلٹ ہائی اسکول میں قومی پرچم لہرایا گیا، قومی ترانہ پڑھا گیا اور کشمیری شہداء سے اظہارِ عقیدت کے لیے دو منٹ کی خاموشی اختیار کی گئی۔ تقریب کا مقصد کشمیری عوام کی جدوجہد کو اجاگر کرنا اور ان کے ساتھ پاکستانی عوام کی یکجہتی کا پیغام دینا تھا۔