فتح جنگ (بیورو رپورٹ) اولیاء کرام کے ساتھ وابستہ ہونے اور ان کی تعلیمات پر عمل پیرا ہونے میں ہی راہِ نجات ہے، حضرت سیدنا عبدالقادر جیلانی روحانیت کے بادشاہ اور اولیاء کرام کے سردار تھے۔ آپ نے اپنی پوری زندگی دینِ اسلام کی ترویج و اشاعت، اصلاحِ معاشرہ اور انسانیت کی رہنمائی کے لیے وقف کیے رکھی۔ آپ کی دینی، روحانی اور علمی خدمات تاریخِ اسلام کا روشن باب ہیں۔ آپ کی تعلیمات آج بھی مسلمانوں کے لیے مشعلِ راہ ہیں اور ان پر عمل پیرا ہو کر دنیا و آخرت میں کامیابی حاصل کی جا سکتی ہے۔ان خیالات کا اظہار علمائے کرام نے بی جی پی کمپنی مسجد میں ملک محمد سرفرازکیمپ منیجر کی زیر نگرانی زیر سرپرستی حاجی سمندر خان ایڈمن بی جی پی محفل گیارہویں شریف سے خطاب کرتے ہوئے کیا مقررین نے کہا کہ اولیاء اللہ کی زندگیوں کا مطالعہ ہمیں اللہ تعالیٰ سے مضبوط تعلق قائم کرنے، نبی کریم ۖ کی سنتوں پر عمل کرنے، سچائی، اخلاص، عاجزی اور خدمتِ خلق کا درس دیتا ہے۔ حضرت سیدنا عبدالقادر جیلانی نے اپنی تعلیمات کے ذریعے لوگوں کو نیکی، تقویٰ، محبت، رواداری اور دینِ اسلام کی حقیقی روح سے روشناس کرایا۔ آپ کی تعلیمات کا بنیادی پیغام اللہ تعالیٰ کی اطاعت، رسول اکرم ۖ کی پیروی اور مخلوقِ خدا کے ساتھ حسنِ سلوک ہے۔انہوں نے مزید کہا کہ موجودہ دور میں معاشرے کو روحانی تربیت، اخلاقی اصلاح اور اتحاد و اتفاق کی اشد ضرورت ہے۔ اولیاء کرام کی تعلیمات کو عام کرکے معاشرے میں محبت، بھائی چارے اور دینی اقدار کو فروغ دیا جا سکتا ہے۔ ہمیں چاہیے کہ بزرگانِ دین کی تعلیمات سے رہنمائی حاصل کریں اور اپنی زندگیوں کو اسلامی اصولوں کے مطابق ڈھالیں تاکہ ایک پُرامن، صالح اور مثالی معاشرے کی تشکیل ممکن ہو سکے۔
