فوڈ پانڈا کی جانب سے ڈارک کچن کے انفرااسٹرکچر کا مظاہرہ

اسلام آباد(نامہ نگار خصوصی )پاکستان کے معروف آن لائن فوڈ ڈیلیوری اور کوئیک کامرس کے پلیٹ فارم فوڈ پانڈا (foodpanda) نے صحافیوں اور میڈیا نمائندوں کے وفد کو اپنے کلاڈ کچن (ڈارک کچن) کے انفرااسٹرکچر کا خصوصی دورہ کرایا۔ اس موقع پر میڈیا کو بریفنگ بھی دی گئی، جس کا مقصد ڈارک کچن کے طریقہ کار سے آگاہ کرنا
اور بتانا تھا کہ صرف ڈیلیوری کے لیے قائم یہ کچن کس طرح صارفین کو کھانے کی زیادہ سہولت فراہم کر رہے ہیں، نئے کاروبار شروع کرنے کی لاگت اور رکاوٹیں کم کر رہے ہیں اور ملک بھر میں مقامی کاروبار کی ترقی میں مدد دے رہے ہیں۔دورے کے دوران صحافیوں نے آرڈر موصول ہونے سے لے کر سامان کے ذخیرے کی فوری نگرانی، کھانے کی تیاری، پیکنگ اور رائیڈرز کے روانہ ہونے تک کے تمام مراحل کا مشاہدہ کیا۔ میڈیا نمائندوں کو کھانے کے معیار، کچن کی صفائی، درجہ حرارت کو قابو میں رکھنے کے نظام اور رائیڈرز کو آرڈر حوالے کرنے کے طریقہ کار کا جائزہ لینے کا موقع بھی دیا گیا۔ ان انتظامات کا مقصد صارفین تک کھانا تیز، مثر انداز اور یکساں معیار کے ساتھ پہنچانا ہے۔اس موقع پر فوڈ پانڈا پاکستان کے ہیڈ آف کچن معین قریشی نے کہا کہ کلاڈ کچن پاکستان کے شہری علاقوں میں کھانے پینے کے کاروبار میں بہتری کا ایک اہم ذریعہ ہیں۔ میڈیا کے نمائندوں کو کچن کے نظام کا شفاف جائزہ فراہم کرنے کا مقصد یہ واضح کرنا ہے کہ ڈیجیٹل سہولتیں چھوٹے فوڈ بزنسز کو آگے بڑھنے، مقامی شیفس کے لیے پائیدار روزگار پیدا کرنے اور صارفین کو قابل اعتماد انداز میں کھانا فراہم کرنے میں کس طرح مدد دیتی ہیں۔ کمپنی کی توجہ کھانے کی تیاری میں جدت اور بہترین انتظامی کارکردگی کو یکجا کرکے ملک بھر میں ایک جامع فوڈ ایکو سسٹم کو فروغ دینے پر مرکوز ہے۔فوڈ پانڈا کے نظام سے منسلک کلاڈ کچن ایسے مراکز کے طور پر کام کرتے ہیں جہاں پہلے سے قائم ریسٹورنٹ برانڈز، منفرد کھانوں کے کاروبار اور گھروں میں کھانا تیار کرنے والے افراد بھاری سرمایہ کاری کے بغیر اپنے کاروبار کو نئے علاقوں تک پھیلا سکتے ہیں۔ روایتی ریسٹورنٹ کی طرح بیٹھ کر کھانے کی جگہ قائم کرنے کے لیے زیادہ سرمایہ درکار ہوتا ہے، جبکہ کلاڈ کچن میں یہ ضرورت کم ہو جاتی ہے۔ فوڈ پانڈا مکمل سہولتوں سے آراستہ کچن اور طلب سے متعلق اعدادوشمار فراہم کرتا ہے، جس سے کاروباری افراد کھانے کے معیار پر توجہ دے سکتے ہیں، جبکہ پلیٹ فارم ترسیل، ٹیکنالوجی کے نظام اور ڈیلیوری کے انتظامات سنبھالتا ہے۔دورے کے دوران مقامی فوڈ اتھارٹیز کی ہدایات پر عمل درآمد، عملے کی حفاظتی تربیت اور صفائی کے باقاعدہ معائنے بھی دکھائے گئے۔ اس اقدام کا مقصد صرف ڈیلیوری کے لیے کام کرنے والے کچن سے متعلق صنعت میں پائی جانے والی عام غلط فہمیوں کو دور کرنا بھی تھا۔