سعودی عرب کا حوثیوں کے کسی بھی حملے کا بھر پور جواب دینے کا اعلان

ریاض،صنعا(نیوز ایجنسیاں )سعودی عرب کی کابینہ نے یمن میں حوثی باغیوں کے ساتھ جاری کشیدگی کے دوران کسی بھی حملے کا بھرپور جواب دینے کا اعلان کیا ہے۔سعودی پریس ایجنسی کے مطابق ولی عہد شہزادہ محمد بن سلمان کی زیر صدارت کابینہ کے اجلاس میں عالمی بحری تجارت اور توانائی کی فراہمی کو لاحق خطرات کی مذمت کی گئی۔اجلاس میں بحری راستوں کی حفاظت یقینی بنانے کے لیے فوری اقدامات کرنے کا مطالبہ بھی کیا گیا۔کابینہ نے خلیج تعاون کونسل اور جی 20 کے ساتھ علاقائی استحکام کے لیے جاری سفارتی کوششوں کا بھی جائزہ لیا اور واضح کیا کہ سعودی عرب کے دفاع پر کوئی سمجھوتا نہیں کیا جائے گا۔دوسری جانب یمن کی مسلح افواج کے ترجمان ماجد عبداللہ النزیلی نے دعوی کیا ہے کہ سرکاری فورسز نے حوثی باغیوں کے اجتماعات اور گاڑیوں کو نشانہ بناتے ہوئے 1208 حملے کیے ہیں۔سوشل میڈیا پر جاری بیان میں ترجمان نے دعوی کیا کہ الجوف اور مارب کے محاذوں پر تقریبا 370 حوثی جنگجوں کو ہلاک کیا گیا جبکہ تقریباً 120 گاڑیاں تباہ کی گئیں۔ماجد عبداللہ النزیلی نے کہا کہ حکومتی فورسز کی حوثیوں کے ساتھ جھڑپیں بھی ہوئیں جن کے نتیجے میں بعض محاذوں پر اہم پوزیشنز کا کنٹرول حاصل کیا گیا اور ان پوزیشنز پر دوبارہ قبضے کی حوثیوں کی کوششیں ناکام بنائی گئیں۔ادھرریاض میں امریکی سفارت خانے نے اپنے سرکاری ملازمین کے لیے سعودی عرب کے اندر نقل و حرکت سے متعلق پابندیاں بھی عائد کی ہیں۔ امریکی سفارت خانے نے سعودی عرب میں سکیورٹی الرٹ دوبارہ جاری کرتے ہوئے غیر ہنگامی سرکاری ملازمین اور ان کے اہل خانہ کو حفاظتی خدشات کے پیش نظر ملک چھوڑنے کی ہدایت کردی ہے۔امریکی سفارت خانے نے سوشل میڈیا پلیٹ فارم ایکس پر جاری بیان میں کہا ہے کہ ایران کے حمایت یافتہ حوثیوں کی جانب سے شہری ہوائی اڈوں اور دیگر اہم تنصیبات پر حملوں کے باعث سکیورٹی خطرات بڑھ گئے ہیں۔سفارت خانے کے مطابق ان حملوں میں شہری ہلاکتیں ہوئی ہیں اور سفری سرگرمیاں بھی متاثر ہوئی ہیں۔ بیان میں خبردار کیا گیا ہے کہ صورت حال تیزی سے مزید سنگین ہوسکتی ہے۔امریکی سفارت خانے نے اپنے سرکاری ملازمین کے لئے سعودی عرب کے اندر نقل و حرکت سے متعلق پابندیاں بھی عائد کی ہیں۔ہدایت کے مطابق امریکی سرکاری ملازمین کو سعودی عرب کے کسی بھی ہوائی اڈے کے استعمال کے لئے امریکی چیف آف مشن سے خصوصی اجازت لینا ہوگی۔ اس کے علاوہ انہیں یمن کی سرحد سے 20 میل کے اندر سفر کرنے سے بھی منع کیا گیا ہے۔سفارت خانے کا کہنا ہے کہ یہ اقدامات عملے اور ان کے اہل خانہ کی حفاظت یقینی بنانے کے لئے کئے گئے ہیں۔
جواب