لاہور(کرائم رپورٹر)ایف آئی اے لاہور زون نے شاہ عالم مارکیٹ لاہور اور شیخوپورہ میں کارروائیاں کرتے ہوئے معروف رجسٹرڈ کمپنی کے نام سے جعلی مصنوعات تیار اور فروخت کرنے والی فیکٹری پکڑ لی۔ تفصیلات کے مطابق ایف آئی اے
کارپوریٹ کرائم سرکل کی کارروائی کے دوران جعلی مصنوعات کی بھاری کھیپ برآمد کرکے دو ملزمان کو گرفتار کرلیا گیا ہے۔ترجمان ایف آئی اے کے مطابق گرفتار ملزمان کی شناخت نبیل ایوب اور ذیشان کے نام سے ہوئی ہے۔ ملزمان معروف رجسٹرڈ کمپنی کے برانڈ کی مصنوعات بغیر اجازت تیار اور فروخت کرنے میں ملوث پائے گئے۔ایف آئی اے حکام نے جعلی مصنوعات کی بڑی تعداد قبضے میں لے لی۔ ابتدائی تحقیقات کے مطابق ملزمان کاپی رائٹ ایکٹ کی خلاف ورزی میں ملوث ہیں۔ گرفتار ملزمان کے خلاف مزید تفتیش جاری ہے۔
